كورسیكێ راكه‌ن دۆشه‌كه‌كێ بدانن
ژیانا كوردان یاریه‌كا سه‌یره، شۆره‌ش و خه‌بات و دۆرپێچ و ئابلۆقێن ئابووری و ره‌ڤین و ئاوه‌ره‌بوون و كۆچبه‌ری، سۆتنا گوندان و وێرانكرنا مالان و ده‌سته‌سه‌ركرن و سێداره‌دان، ژ بلی چار دوژمنێن داگیركه‌رێن وه‌لاتێ مه ب ده‌هان دوژمنێن دی ژی یێن بووینه یاریكه‌رێن ڤێ یاریا بێ دووماهی، ئه‌ڤه ژبلی كو دونیا هه‌می دوژمنێ كه‌وی یه و كه‌و ب خوه ژی دوژمنێ سه‌رێ خوه‌یه.
به‌ری 24 سالان مه چاڤه‌كێ خوه ل دونیایێ ڤه‌كر و مه سینگێ خوه بۆ ئازادیێ كێل كربوو، به‌ری 24 سالان گوتنا ئه‌حمه‌دێ خانی د گوهێن مه‌دا زه‌نگ لێ ددا و ئه‌م هه‌می ببووینه ئه‌حمه‌دێ خانی و مه ب ماچه‌كا مه‌لایێ جزیری ئێكد و هه‌مبێز دكر، به‌لێ ب هه‌لبه‌ستێن ئه‌حمه‌دێ نالبه‌ند هه‌می ده‌ستكه‌فت شوور بوونه پێسیری و بوو به‌ریكانا به‌ریكان و شۆره‌شڤانێن ده‌مه‌كێ بوونه ئاغایێن سه‌رده‌م، به‌ری 24 سالان ئه‌سمانێ كوردستانێ ب هه‌می ره‌نگێن جوان هاتبوو خه‌ملاندن و پشتی وان ره‌نگان خوه لێكدای جوانترین ئالا ژێ چێبوو، به‌لێ نوكه هێدی هێدی ئه‌و ره‌نگ یێن ژ ئێك جودا دبن و هه‌ر ئێك یێ بۆ خوه وه‌كو خوه نه‌خشان ل مه‌حفیران كه‌ت.
به‌ری 12 سالان مه چاڤێ دی ژی ل دونیایێ ڤه‌كر و مه ژ نوو هه‌می جوانیا دونیایێ و سروشتێ كوردستانێ دیت و ب كه‌یفه‌كا گه‌له‌ك مه‌زن مه پێشوازی ل هه‌رفاندنا كه‌لهێن سته‌مكاریێ كر، ئه‌م كورد بووینه كورد و كوردستان ژی بوو كوردستان، مه وه‌سا هزر كر كو ئه‌و ده‌ستپێكه‌كه بۆ سه‌رخوه‌بوونا ب ئێكجاری و ئێدی ئه‌م ژی دێ وه‌كو ملله‌تێن جیهانێ ژین و سه‌رفراز بین، ئه‌م ژی وه‌كو وان وه‌لاتان دێ بینه خودان كارگه‌ه و پیشه‌سازی و سامانه‌كێ نشتمانیێ ب هێز. لێ ئاڤاكرنا ئاڤاهیێن بلند و جادێن بێ سه‌روبه‌ر و تژی ته‌سه و كه‌ند و كوور و چه‌ند باغچێن بێ فریز و داروبار و ئۆتێل و مۆتێل و چه‌ند ئۆڤه‌رپاس و بیرێن پترۆلێ ئه‌م خاپاندین، مه وه‌سا هزر دكر كو شه‌نگستێن ده‌وله‌تێ نه و ئه‌م ژی وه‌كو وه‌لاتێن كه‌نداڤی دێ پلیتكانێ ب ده‌فته‌رێن دۆلاری كه‌ین و زارۆیێن مه دێ بنه خودان باشترین پاشه‌رۆژ. مه وه‌سا هزر كر ده‌مێ پێشوازیێن گه‌رم ل سه‌ركردێن مه ل وه‌لاتێن زلهێزێن جیهانێ دهێته كرن كو ئه‌م ده‌وله‌تین و ب تنێ دڤێت راگه‌هینین، مه وه‌سا هزر كر كو هاتنا سه‌رمایه‌داران نیشانا ئابووره‌كێ ب هێزه و ئه‌م ئێدی پێدڤی چو كه‌سان نابین بۆ مه كه‌رستێن پووچ و په‌لاچه ب بهایێن مه‌زن بینن، مه وه‌سا هزر كر ئێدی ئه‌ڤ ئاخه دێ ڤه‌گه‌ریته ره‌وشا جاران و ئێدی باجانسۆرك و كه‌ره‌فس بۆ مه ژ وه‌لاتێن ده‌رڤه ناهێن و دێ جاره‌كا دی بینه خودان ره‌ز و باغ و بیستان.
به‌لێ وه‌سا دیار بوو كو ئه‌و ئاڤاهیێن بلند و ئۆتێل و مۆتێل یێن چه‌ند كه‌سانه و ل سه‌ر حسابا گشتی هاتینه ئاڤاكرن و وه‌كو ره‌وشه‌نبیره‌كێ دهۆكێ بۆ ته‌له‌ڤزیۆنه‌كا كوردستانێ گۆتی: هندی ئاڤاهی بلند دبن به‌ژنا مرۆڤان ل به‌ر كورت دبیت، جاده و ئۆڤه‌رپاس ژی ب تنێ بۆ تژیكرنا به‌ریكێن هنده‌كێن دی هاتینه چێكرن و ئه‌و باغچێن بێ سه‌روبه‌ر ژی بۆ په‌سن و مه‌تحان هاتینه دروستكرن. وه‌سا دیار بوو كو بیرێن پترۆلێ ژی زێده‌كرنا دوژمنه‌كێ دی بوو ل دوژمنێن مه و ئه‌م پتر ژ دوژمنان شه‌ری ل سه‌ر دكه‌ین. وه‌سا دیار بوو كو ئه‌و شه‌نگستێن ده‌وله‌تێ یێن مه هزر ژێ دكر ب خیزی هاتینه چێكرن و هه‌رده‌مێ بایه‌كێ ب هێز بهێت دێ هه‌ڕفینیت، وه‌سا دیار بوو كو ب تنێ چه‌ند كه‌سه‌ك پلیتكانێ ب ده‌فته‌رێن دۆلاری دكه‌ن و یێن دی ب تنێ دۆلاران د جامێن پاره‌گوهۆران دا دبینن، وه‌سا دیار بوو كو ئه‌م ب خو یێ دوژمناتیا وان پێشوازیێن گه‌رم دكه‌ین یێن وه‌لاتێن زلهێز و یێن دی یێن جیهانێ ل سه‌ركردێن مه دكه‌ن. ئابوورێ مه ژی مامێ مالكی ب ئاماژه‌كرنا ب سه‌رێ تبلێ دا بای.
سه‌ره‌رای ڤێ ره‌وشا ئه‌م نوكه تێدا، چارگۆشا بێ مووچه و كاره‌ب و ئاڤ و پانزین، ئه‌م یێن كه‌تینه د بازنێ كۆمبوونێن پێنج قۆلی دا، هه‌تا وی راده‌ی كو هژمارا (5) یا بوویه پارچه‌ك ژ یانا مه‌یا رۆژانه، پێنج قۆلی پێنج ستوونێن ئیسلامێ و پێنج نڤێژان دئیننه بیرا مه و ئه‌م یێن فێربووین رۆژێ پێنج دانێن خوارنێ دخۆین و پێنج چایا ڤه‌دخۆین و ژ پێ پاره‌یی رۆژێ ب تنێ پێنج هزاران دمه‌زێخین و ژ بێ كاری رۆژێ به‌رێخوه دده‌ینه پێنج فلمێن MBC2 و نێزیكه دێ كومكانێ و دومینێ ژی كه‌ینه پێنج قۆلی. به‌لێ ئه‌م ملله‌تێ خشیم و نه‌زان وه‌سا ل به‌ر شاشێن ته‌له‌ڤزیۆنان د راوه‌ستیاینه و چاڤه‌رێ ئه‌نجامه‌كی نه و یا ژ مه‌ڤه دێ مه به‌نه سه‌ربانێ هه‌یڤ و مه‌ریخان، ده‌مێ تو كۆمبوونێن وان د ته‌له‌ڤزیۆنێ دا دبینی وه‌سا د كه‌یفخوشن دێ بێژی چو ئاریشه ل كوردستانێ نینن و ب تنێ ئه‌و یێ پلانه‌كێ بۆ 50 سالێن داهاتی بۆ كوردستانێ د دانن.
ئاریشا حزبان یا ل هه‌می مالان و ئاریشا چو مالان د كۆمبوونێن وان دا نینه، ئه‌م ملله‌ته‌كین نه ئه‌م ب كێر دیموكراسیێ دهێین و نه دیموكراسیه‌ت ب كێر مه دهێت، له‌عنه‌ت ل سازانێ بن، له‌عنه‌ت ل دیموكراسیێ بن، له‌عنه‌ت ل وان كه‌سان بن یێن ل سه‌ر حسابا هه‌ژاران خوه ب هێز دكه‌ن، له‌عنه‌ت ل كورسیكێ بن. باشترین چاره ئه‌وه كورسیكێ راكه‌ن و دۆشه‌كه‌كێ بدانن دا جهێ هه‌میان بكه‌ت، به‌لێ ب تنێ پیچه‌كێ ل خه‌مێن ملله‌تی ژی بگه‌رن.
