كولیژا هونه‌رێن جوان فەستیڤالا خوە یا دویێ گێڕا
هه‌رهین محه‌مه‌د:
ل ژیر دوریشمێ هونه‌ر د هه‌مبێزا ئێك و دوو قه‌بولكرنێ دا كۆلیژا هونه‌رێن جوان ل زانكۆیا دهۆك دووه‌مین فێستیڤالا خوە یا سالانه گێرا د ئه‌ڤێ فێستیڤالێ دا هه‌ر سێ پشكێن ( مۆزیك و شانۆ شێوه‌كار) ب مۆزیك و نمایشا كه‌ڤال و شانویان دا پشكداربوون.
رێبه‌ر روشدی، هاریكارێ راگرێ كۆلیژا هونه‌رێن جوان بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: د دووه‌مین فێستیڤالا كولیژا هونه‌رێن جوان دا هه‌ر سێ پشك دپشكداربوون و د رۆژا ئێكێ دا پشكا مۆزیكێ نێزیكی بیست و چار قوتابێن كچ و كور پشكداربوون و گه‌شته‌كا سترانێن كوردی یێن فلكوری ل سه‌ر ده‌پێ شانویێ گۆتن و هه‌ردیسان دئه‌وێ رۆژێ دا رێوره‌سمێن ڤه‌كرنا پێشانگه‌ها پرۆژه‌یێن قوتابیێن پشكا شێوه‌كاری بوون و نێزیكی بیست و حه‌فت پرۆژێن قوتابیان یێن قوناغا چارێ بوون و نه‌مایشا كه‌ڤالێن قوتابیان بۆ ده‌مێ سێ رۆژان یا به‌رده‌وام بوو و هه‌ردیسان رۆژا سیێ ژی ل دانێ سپێدێ شانوگه‌ریه‌ك هاته پێشكێشكرن و دووڤدا په‌نه‌له‌ك هه‌بوو ل گوره‌ی ئه‌وێ شانوگه‌ریێ هاته به‌حسكرن و دیسان هه‌رد ئه‌وێ رۆژێ دا شانوگه‌ریه‌كا دی ژی هاته نمایشكرن
هێشتاژی گۆت: ل گه‌ل فێستیڤالێ ژی بۆ ئێكه‌م جار مه كه‌ته‌لوكه‌كا گه‌له‌ك جوان چێكربوو و دسالا بوری ژی دا مه كه‌ته‌لوكه‌ك چێكربوو ، به‌لێ ئه‌ڤ ساله د مێژوویا هونه‌ری دا تشته‌كێ گه‌له‌ك جوان مه چێكربوو پێكهاتبوو ژ نێزیكی سه‌د لاپه‌ران مه پرۆژێن قوتابیان كربوونه تێدا هه‌روه‌سا وێنه و كه‌ڤالێن وان بزمانێ كوردی و ئینگلیزی تێدا هاتبوونه دیاركرن و ل رۆژا دووماهیێ مه ئاهه‌نگه‌ك دروستكر بۆ خێزانێن قوتابیێن قوناغا چارێ ئه‌وێن خۆدان پرۆژه گۆت: ئه‌ڤه سالا دووێ یا فێیستیڤالێ یه و سال بۆ سالێ ئه‌م یێن خوه پێش دئێخین و گوهورینان دكه‌ین، فێستیڤالا سالا بوری نه وه‌كو یا ئه‌ڤ ساله بوو ئه‌ڤ ساله گه‌له‌ك به‌رفره‌هتر هاته گێران ، چونكو ئه‌ڤ ساله ژ هه‌موو قوناغان پشكداری هاتبووكرن و قوناغا ئێكێ ژی ل گه‌ل بوو و دبینم هندی فێستیڤال بهێنه‌كرن به‌رهه‌مێ ماندی بوونا خۆ یا چار سالان دهێته نیشاندان و قوتابی ژی ب شێوه‌كێ ئه‌كادیمی دهێته ئاڤاكرن و پتر دهێته دگوره‌پانێ دا و سوباهی ئه‌ڤ قوتابیه ب ده‌رچیت و دێ كارێن باش بۆ هێنه به‌رده‌ست و دێ شێت دناڤ كومه‌لگه‌هێدا كاره‌كێ باش بینت و ب شێوه‌كێ ئه‌كادیمی كاركه‌ت.
سه‌مه‌دار محه‌مه‌د تاها، بریارده‌رێ پشكا مۆزیكێ ل كۆلیژا هونه‌رێن جوان ل زانكویا دهۆكێ بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: ب هه‌لكه‌فتا دووه‌مین فێستیڤالا كۆلیژا هونه‌رێن جوان ئه‌م وه‌كو پشكا مۆزیكێ مه ڤیایه قه‌فته‌كا سترانێن كوردی ب كۆنسێرت پێشكێشی ئه‌وان قوتابیان بكه‌ین ئه‌وێن قوناغا چارێ ده‌رچن ل پشكێن دی و پشكا مه پشكه‌كا نویه و ئه‌و قوتابیه نه ئه‌وێن دقوناغا دوازدێ را هاتین و ئه‌ڤ ساله بتنێ تێستا وان ل سه‌ر ده‌پێ شانویێ بوو وتشته‌كی ژێ بزانن و ورێره‌كی بۆ وان چێبیت و د نوكه دا كارێ مه دیارناكه‌ت، به‌لێ ل سالا چارێ ل سه‌ر مه فه‌ره و فه‌رزه كو پرۆژه‌یێن قوتابیان دیاربكه‌ینو بتنێ مه ڤیا ب قه‌فته‌كا سترانێن كوردی پشكداربین بۆ قوتابێن قوناغا چارێ كو ئه‌ڤ ساله دێ ده‌رچن یێن پشكێن دی.
سه‌مه‌داری زێده‌تر گۆت: هه‌ر كه‌سه‌كێ ل كونسێرتێ ئاماده‌بووی گه‌له‌ك حه‌ز ژێكر و ده‌ستخوه‌شی ل مه و قوتابیانكرن و گۆتن ئه‌ڤه كاره‌كێ گه‌له‌ك باشه هه‌وه كری كو قوتابیێن نوی یێن ژ قووناغا دوازدێ هاتین و نوی نه و شیان ل سه‌ر ده‌پێ شانویێ ئاماده‌بن و ب ئه‌ڤی شێوازی سترانا بێژن و گۆتن ئه‌و سترانێن هه‌وه هه‌لبژارتین خامه‌كا كوردی بوون و بۆ گوهێ بینه‌ری گه‌له‌ك یا خوه‌ش بوو و هه‌موویان ب سنگه‌كێ به‌رفره‌ه وه‌رگرت گۆت: ئه‌و قوتابیێن دقوناغا دوازدێ را هاتین ل ده‌ستپێكێ تاقیكرن ب ده‌نگێ وان هاتیه كرن و ژنوی هاتینه وه‌رگرتن، له‌ورا ژ بۆ ئه‌ڤێ كونسێرتێ ئه‌م ژده‌نگێن وان پشت راست و درازی بووین و بینه‌ران ژی ب چاڤێ خوه دیت و ب گوهێ خوه گوه ل ده‌نگێ وان یێ خۆش بوویه.
یوسف ره‌شید سه‌رۆكێ پشكا شانۆیێ ل كۆلیژا هونه‌رێن جوان ل زانكویا دهۆكێ بۆ به‌رپه‌رێ هونه‌ری یێ رۆژنامه‌یا ئه‌ڤرۆ گۆت: سالانه پشكا شانۆیێ پشكداری فێستیڤالێ دبیت و دڤێ فێستیڤالێ دا ب سێ پرۆژه‌یان ئه‌م پشكداربووبن و پرۆژه‌یێن قوتابیێن قوناغا چارێ نه و هه‌موو قوتابی یێن قوناغا چارێ ل هه‌موو پشكان پشكداردبن و پرۆژێ ئێكێ (روح دمالبچیكێ شكسپیری دا) كو ژده‌رهێنانا قوتابی كاروان سلو و ب پشكداریا قوتابیێن قوناغا چارێ و قوناغێن دی تر ئه‌ڤ نه‌مایشه ل رۆژا دووێ ژ فێستیڤالێ هاته نمایشكرن و هه‌ردیسان شانوگه‌ریا خه‌ونه‌ك ژده‌رڤه‌ی بازنه‌ی و ل رۆژا سێ نه‌مایشا (باران) ژ ده‌رهێنانا قوتابی فاتما مسلح پیرو ڤه هاته پێشكێشكرن و دئه‌ڤی پرۆژه‌ی دا قوتابیێن هه‌رچار قوناغا دپشكدارن و هه‌روه‌سا ل هول و باخچێن كولیژێ فیستیڤال به‌رده‌وامه و هه‌ردیسان ل هولاجزیری ژی شانوگه‌ری دهێنه نمایشكرن و جهێ سوپاسیێ یه قوتابیێن مه به‌رهه‌مێ چار سالێن خواندنا خۆ یا زانكۆیێ پێشكێشی باژێرێ خوه بكه‌ن و داخازا سه‌ركه‌فتنێ بۆ قوتابیێن خوه دخازم ل هه‌رچار قوناغان ب تایبه‌تی قوتابیێن قوناغا چارێ.
ئه‌و چه‌نده‌ژی گۆت: ژبلی نمایشا ئه‌ڤان پرۆژان مه‌ره‌ما مه ئه‌وه ژی ئه‌م بینه‌رێ خوه یێ شانویێ جاران ب زڤرینه‌ڤه و جهێ خوه‌شحالیێ بوو بۆ ده‌مێ دو رۆژان ل دانێ سپێده و ئێڤاران پرۆژێن قوتابیان هاتنه نمایشكرن و دوهی ژی ل هولا پێشمه‌رگه‌دا ل زانكۆیا دهۆكێ جهێ روینشتنێ نه‌مابوو بینه‌ر بهێن ژ بۆ دیتنا شانویێ و مه دیت قوتابێن ژده‌رڤه و دناڤ زانكویێ حه‌زا دیتنا شانۆگه‌ریان هه‌یه و دبینم مه بینه‌رێ خوه یێ شانویێ یێ زڤراندی و به‌لگه ژی د نه‌مایشا ئه‌ڤان پرۆژه‌یان دا دیاربوو.
