كولی زیان ب به‌رهه‌مێ جۆتیارێن ئه‌ترۆش گه‌هاندیه
ئه‌ڤرۆ نیوز،بارزان مزووری:
ل سنورێ ناحیا ئه‌ترۆش جوره‌كێ”كولی” زیانێن مه‌زن گه‌هاندینه جۆتیارێن ده‌ڤه‌رێ به‌رهه‌مێ وان یێ ئه‌ڤ سال یێ گوندۆر و تروزیا ب ئێكجاری ژناڤبریه.
سلێمان ئه‌مین،ئێك ژ جۆتیارێن گوندێ مێرسیدا سه‌ر ب ناحیا ئه‌ترۆش بۆ ئه‌ڤرۆ نیوز گۆت:ئه‌ڤه بۆ ئێكه‌م ساله ئه‌ڤ جورێ كولی دهێته دیتن ل ده‌ڤه‌رێ ره‌نگێ وی یێ “ره‌شه”هه‌ر جهه‌كێ لێ داده‌ت ژ وی جهی ناچن هه‌تا ئه‌و جهه‌ك بهێته ناڤبرن ئه‌ڤ كولیه ل دوماهیا هه‌یڤا ره‌مه‌زانێ ده‌ركه‌فتیه ئه‌و به‌رهه‌مێ ئه‌ڤ سال یێ گوندۆر و ترۆزیا سه‌دان دونه‌م یێن ناڤبرین.
ناڤهاتی خویاكر دوو جاران ب ئامیرێن ره‌شاندنێ ره‌شاندیه به‌لێ یا بێ مفا بوویه رۆژ ب رۆژێ رێژا وان زێده‌تر لێ دهێت ئه‌و به‌رهه‌مێ هاتیه چاندن ل سه‌ر عه‌ردی را بریه،ژبلی به‌رهه‌مێ جۆتیاران به‌لگێن چلی و داروباری تێكداینه ئه‌گه‌ر بڤی شێوه‌ی بیت ئه‌ڤ سال جۆتیار دێ توشی زه‌ره‌رێن مه‌زن بن.
عومه‌ر حسێن،به‌رپرسێ هوبا چاندنێ ل ئه‌ترۆش بۆ ئه‌ڤرۆ نیوز گۆت:ئه‌و جۆتیارێن مه به‌ری نها ده‌رمانێ كوشتنا سنكی دایه وان ئه‌و دشێن وی ده‌رمانی بكاربینن بۆ كوشتنا ڤی جورێ كولی ژبه‌ركۆ كولیه‌ك مه‌ترسیه بۆ ده‌ڤه‌رێ، تیمێن مه یێن چاندنێ دێ سه‌ره‌دانا وان جهه‌ن كه‌ن یێن كولی زیان پێ گه‌هاندی .
