كومسیۆن: ل مەها بهێت بەربژارێن هەلبژارتنان دێ هێنە پەسەندكرن
كۆمسیۆنا بلند یا سەربخوە یا هەلبژارتنان ل ئیراقێ راگەهاند: ل مەها تەمووزێ دێ هووربینیێ ل دۆسێیا بەربژارێن هەلبژارتنێن جڤاتا نوونەرێن ئیراقێ كەت و دێ هێنە هنارتن بۆ ئالیێن پەیوەندیدار ب مەبەستا ڤەكۆلینێ ل دۆسییێن وان، ل مەها تەباخێ ژی دێ ناڤێن بەربژاران هێنە پەسەندكرن.
عیماد جەمیل، سەرۆكێ تیما رۆژنامەڤانییا كۆمسیۆنا بلند یا سەربخوە یا هەلبژارتنان ل ئیراقێ، گوت» لژنەیێن كۆمسیۆنێ دەست ب هووربینیێ ل دۆسێ و بەلگەنامەیێن وان بەربژارێن ناڤێن خوە پێشكێش كرین بۆ پشكداریێ د هەلبژارتنێن جڤاتا نوونەرێن ئیراقێدا هاتیە كرن، هەر بەربژارەكێ كێشە د بەلگەنامەیێن وی دا هەبیت، دێ داخواز ژێ هێتە كرن راستڤەكەت».
گوت ژی» هووربینیێ د زێدەتر ژ حەفت هزار و 900 ناڤێن بەربژاراندا دكەین، كو چاڤەڕێ دهێتە كرن ل چەند رۆژێن داهاتی ب دووماهی بهێتە و ئاراستەی ئالیێن پەیوەندیدار بهێتە كرن ب مەبەستا ڤەكۆلینێ ل دۆسییێن وان و ل مەها تەباخێ ناڤێن وان ب فەرمی دێ هێنە پەسەندكرن».
ناڤێن ەبربژاران دێ هێنە هنارتن بۆ چەند وەزارەت و دەزگەهان بۆ ڤەكۆلینێ ل دۆسییێن وان، ژوان ژی: دەستەیا دەستپاكیێ، لێپرسین و دادوەری، وەزارەتێن ناڤخوە، خواندنا بلند و پەروەردێ.
بڕیارە هەلبژارتنێن جڤاتا نوونەرێن ئیراقێ ل 11/11/2025 بهێنە ئەنجامدان، هەر پارێزگەهەك ل ئیراقێ و هەرێما كوردستانێ، بازنەیەكێ هەلبژارتنایە.
