كوڕێن خابووری رژدن بۆ ڤه‌گه‌ڕاندنا رێزبه‌ندیا خوه
ئه‌ڤرۆ،
چاڤه‌ڕێ یه سوبه‌هی ل ده‌مژمێر 4:45 ئێڤاری تیما یانا زاخۆ ل یاریگه‌ها یانا دهۆكێ مێڤانداریا یانا سیناعه یا به‌غدایی ژ چارچووڤێ هه‌ڤڕكیێن گه‌ڕا 35ێ یا قۆناغا دویێ ژ خولا ئیراقێ بۆ یانێن پلا نایابا یا ته‌پا پێی ئه‌وا دێ یاری بێ جه‌ماوه‌ر بیت لدووڤ بڕیارێن لژنا به‌ریكانا ده‌رئه‌نجامێ ئه‌وان سزایێن به‌ری هه‌یڤه‌كێ ل سه‌ر یانا زاخۆ هاتینه ده‌ڕكر.
دنوكه دا كوڕێن خابووری ل رێزا ده‌هێ دهێن ب 44 خالان و د كاودانه‌كێ هه‌ستیار دانه تایبه‌ت پشتی چه‌ندین ئه‌نجامێن لاواز یێن ڤێ دووماهیێ ژوانا ل گه‌ل زه‌ورا، نه‌فت و جه‌ویه كو هه‌رسێ یاریا تووشی خوساره‌تیێ بوون، لێ بۆ ڤێ یاریێ دێ هه‌موو بزاڤا كه‌ن رێزبه‌ندی و ئاست و ئه‌نجامێن خوه ڤه‌گه‌ڕینت و جه‌ماوه‌رێ خوه ئاشت بكه‌ت، هه‌مبه‌ری وێ تیما سیناعه ژی د رێزبه‌ندیه‌كا خراب دایه و ترسا داكه‌فتنێ لسه‌ر هه‌یه ئه‌وا 35 خال كومكرین و رێزا 16ێ دهێت، دێ بۆ سه‌ركه‌فتنێ و ده‌ستڤه ئینانا ئه‌نجامه‌كێ باش هێته دناڤ یاریگه‌هێ دا.
لدور دووماهی به‌رهه‌ڤیێن زاخۆ فیراس ئه‌لخه‌تیب راهێنه‌رێ تیمێ گۆت: پشتی خوساره‌تیا نه چاڤه‌ڕێ كرن ل گه‌ل یانا جه‌ویه ئه‌م ل سه‌ر كێماسی و خه‌له‌تیێن یاریزانان راوه‌ستیان له‌ورا بۆ یاریا سوبه‌هی مه به‌رهه‌ڤیێن باش كرینه و رژدین باشترین ئه‌نجام ده‌ستخوه‌ڤه بینن ژبۆ وێ یه‌كێ ڤه‌گه‌ڕێنه رێزبه‌ندیه‌كا باشتر، سه‌رباری ئه‌ركێ مه ب سانه‌هی نینه و دێ یاریه‌كا ب هێز بیت ژبه‌ركو تیما سیناعه دێ ب هه‌موو چه‌ك و هێزا خوه یاریێ كه‌ت پێخه‌مه‌ت خوه قۆرتالكرن ژ داكه‌فتنێ، لێ مه ئێك ئارمانج هه‌یه دڤێت زاخۆ به‌ر ب سێ خالێن یاریێ ببه‌ین.