كچلدار ئوغلۆ: مه دڤێت ئاكپارتیێ ژ ده‌ستهه‌لاتێ دوور بكه‌ین
ئه‌ڤرۆ:
كه‌مال كچلدار ئوغلۆ سه‌رۆكێ گشتی یێ پارتا كۆماریا گه‌ل راگه‌هاند كو وان دڤێت هه‌موو پرسێن نها یێن توركیا ب رێیا ئاشتیێ چاره‌سه‌ر بكه‌ن، چونكو ب شه‌ری چو پرسه‌ك ناهێته چاره‌سه‌ركرن، لێ مخابن ده‌ستهه‌لاتا ئاكپارتیێ د ماوه‌یێ چه‌ندین سالێن بۆری دا توركیا تووشی گه‌له‌ك قه‌یرانان كریه، ژ به‌ر هندێ ژی پارتا كۆماری نها ب هه‌موو ره‌نگه‌كێ خوه بۆ ده‌ستهه‌لاتێ به‌رهه‌ڤ دكه‌ت و ده‌م یێ هاتی كو ئاكپارتی ژ ده‌ستهه‌لاتێ بهێته دوورخستن و گۆت: (مه دڤێت پرسا كوردی و هه‌موو پرسێن دی یێن توركیا ب رێیا په‌رله‌مانی بهێنه چاره‌سه‌ركرن، ئه‌ردۆغانی ده‌ستهه‌لاتا په‌رله‌مانی نه‌هێلایه و خوه كریه هه‌موو تشت و ب تنێ بریارێ ل دۆر پاشه‌رۆژا هه‌موو توركیا دده‌ت، ژ به‌ر هندێ ژی ئه‌ردۆغانی توركیا تووشی قه‌یرانه‌كا گه‌له‌ك مه‌زن كریه).
ناڤهاتی راگه‌هاند كو وان دڤێت توركیا ژ قه‌یرانا نها رزگار بكه‌ن، ژ به‌ر هندێ ژی دڤێت گه‌لێ توركیا ب رێیا هه‌لبژارتنان دووماهیێ ب ده‌ستهه‌لاتا گه‌نده‌ل یا ئه‌ردۆغانی بینن و توركیا ژ گه‌له‌ك كاره‌ساتان قورتال بكه‌ن، چونكو ئه‌ردۆغانی چو پرۆژه بۆ توركیا نینن، ئه‌و تنێ بۆ درێژكرنا ژیێ ده‌ستهه‌لاتا خوه كار دكه‌ت.
سه‌رۆكێ گشتی یێ پارتا كۆماریا گه‌ل ل دۆر سه‌ره‌دانا شاندێ پارتا وان بۆ هه‌رێما كوردستانێ ژی راگه‌هاند كو مه دڤێت ل گه‌ل كوردان و هه‌موو خه‌لكێن دی یێن رۆژهه‌لاتا ناڤین ده‌ست ب قۆناغه‌كا نوو بكه‌ین، مه دڤێت دوور ژ شه‌ری و ب رێیا دانوستاندنان هه‌موو پرسێن هه‌ی چاره‌سه‌ر بكه‌ین، سه‌ره‌دانا مه بۆ هه‌رێما كوردستانێ ژی گه‌له‌ك گرنگ بوو و بێگومان دێ ئه‌نجامێن خوه یێن گه‌له‌ك باش ژی هه‌بن.
چاڤدێرێن سیاسی یێ باكورێ كوردستانێ ژی دیار دكه‌ن كو پارتا كۆماریا گه‌ل دڤێت وه‌كو هه‌لبژارتنێن باژێرڤانیان دیسان ب رێیا ده‌نگێن كوردان ئاكپارتیێ تووشی شكه‌ستنێ بكه‌ت، لێ هه‌تا نها دیار نینه كا دێ كورد پشته‌ڤانیێ ل پارتا كۆماریا گه‌ل كه‌ن یان نه؟ چونكو هه‌تا نها ژی پارتا كۆماریا گه‌ل چو پرۆژه بۆ چاره‌سه‌ركرنا پرسا كوردی پێشكێش نه‌كرینه و به‌ری نها ژی پارتا كۆماریا گه‌ل ل دژی په‌روه‌ردا ب زمانێ كوردی بوو.
