كچه‌ك: فێسبووك یا بوویه تورا به‌لاڤكرنا وێنه و تابلۆێن مریان
ئه‌ڤرۆ، هه‌رهین محه‌مه‌د:
تورا جڤاكی یا فێسبووكی و سناپی ژ وان تورانه یێن گه‌له‌ك بكارهێنه‌ر هه‌ین، و هه‌ر كه‌سه‌ك ژ بۆ مه‌ره‌مه‌كێ بكاردئینیت و ل ڤێ دووماهیێ و پشتی هاتنا ڤایرۆسێ كۆرۆنایێ ئه‌ڤ توره ب جاره‌كێ بووینه جهێ به‌لاڤكرنا تابلۆ و وێنێن مریان، و ئه‌و كه‌سێن تووشی كۆرۆنایێ دبن و ڤێ چه‌ندێ ژی كارتێكرنێن خوه یێن ده‌روونی هه‌نه ل سه‌ر بكارهێنه‌رێن ڤان تورێن جڤاكی.
گه‌نجه‌ك بناڤێ ده‌روێش عه‌بدی چه‌تو دیار كر، ل ڤێ دووماهیێ تورا فێسبووكی رێژه‌كا نه چاڤه‌رێ كریا وێنه و تابلۆیێن مریان و ده‌نگویێن هاتنا ڤایرۆسێ كورۆنایێ لێ دهێنه به‌لاڤكرن و مرۆڤ نه‌شێت فێسبووكی ڤه‌كه‌ت و ئه‌ڤ چه‌نده بوویه ئه‌گه‌ر گه‌له‌ك كه‌س ئێدی ژ تورا جڤاكی یا فێسبووكی و سناپی دوور كه‌ڤن، ژبه‌ركو ده‌روونێ وان پێ تێك دچیت و پتریا وان كه‌سێن ڤان وێنه‌یێن مریان به‌لاڤ دكه‌ن ئه‌ون یێن كو ئه‌و كه‌سێ مری گه‌له‌ك ژ وان دووره و پێدڤی ناكه‌ت ئه‌و وی ده‌نگویێ نه‌خوش د تورا جڤاكی دا به‌لاڤ كه‌ت و ده‌روونێ گه‌له‌ك كه‌سان پێ نه‌خوه‌ش بكه‌ت و گۆت: (هه‌روه‌سا ئه‌و كه‌سێن دمرن ژی هه‌كه ب پوسته‌كی بێژن فلان كه‌سێ من وه‌غه‌ر كر باشتره وینه‌ی به‌لاڤ كه‌ن و ل سه‌ر بنڤیسن).
كچه‌ك ب ناڤێ هوزان ئیسماعیل دبێژیت: (ب دیتنا من به‌لاڤكرنا وێنه و ده‌نگ و باسێن نه‌خوش د تورێن جڤاكی دا ب تایبه‌ت ل تورا فێسبووكی كارتێكرنا خوه یا ئێكسه‌ر ل سه‌ر ده‌روونێ بكارهێنه‌رێن تورێن جڤاكی كریه، ل ده‌ستپێكا هاتنا په‌تایا كورونایێ كارڤه‌دانه‌كا مه‌زن ل تورێن جڤاكی په‌یدا بویه و ئێك ژ وان كارڤه‌دانا پوستێن وان كه‌سان ئه‌وێن تووشی ڤایروسێ كورونایێ بووین، یان ژ كورونایێ ب دووماهی هاتین، یان به‌لاڤكرنا تابلویێن مریا د فیسبووكی دا كارتێكرنه‌كا مه‌زن ل ب كارهێنه‌رێن تورێن جڤاكی كریه و دبیت مرۆڤ ئێدی حه‌ز نه‌كه‌ت جاره‌كا دی وێ تورێ ڤه‌كه‌ت و گۆت: (تورا فێسبووكی یا بوویه تورا به‌لاڤكرنا وێنێن مریا و تابلۆێن وان) .
ڤه‌كوله‌رێ ده‌روونی جاسم محه‌مه‌د تاهر دیار كر كو هه‌ر ده‌نگ و باسه‌ك و روودانه‌كا نه‌خوش دبیته ئه‌گه‌رێ نه ئارامیێ ل ده‌ڤ مرۆڤی ب تایبه‌ت ده‌نگ و باسێن مرنێ، راسته مرن ئێكه ژ سرۆشتێن ژیانێ، به‌لێ ل گه‌ل مرنا هه‌ر كه‌سه‌كی مرۆڤ هه‌ست ب ئێشانێ و نه ئارامیێ دكه‌ت هه‌تا هه‌كه ئه‌و كه‌سه چه‌ند دووری مرۆڤی بیت ده‌مێ مرۆڤی گوه ل ده‌نگ و باسێ مرنا وی دبیت جوره‌كێ خه‌موكیێ ل ده‌ڤ مرۆڤی په‌یدا دبیت و ئه‌ڤ خه‌موكیه هه‌تا راده‌یه‌كی كارتێكرنێ ل سه‌ر لایه‌نێ مرۆڤی یێ ده‌روونی دكه‌ت و گۆت (ل گه‌ل گه‌شه‌سه‌ندنا تورێن جڤاكی ده‌نگویێن مرنێ زێده بووینه و رۆژانه ب شێوه‌كێ بله‌زتر ئه‌م گوه ل ده‌نگویێن مرنا گه‌له‌ك كه‌سان دبین چ ل سه‌ر ئاستێ باژێری بیت، ژبه‌ر گه‌شه‌سه‌ندنا تورێن جڤاكی و ئه‌ڤ ده‌نگ و باسه گه‌له‌ك بله‌ز دهێنه به‌لاڤكرن ئه‌ڤه ژی وێ واتایێ دده‌ت هندی ده‌نگویێن مرنێ زێده ببن دێ كارتێكرنا ده‌روونی پتر بیت ل سه‌ر مرۆڤی).
ڤه‌كۆله‌رێ جڤاكی ئه‌و چه‌نده ژی دیار كر كو د تورێن جڤاكی دا هنده‌ك ئه‌كاوانت هاتینه چێكرن بتنێ كارێ وان به‌لاڤكرنا ده‌نگویێن كه‌سانێن نه‌خوش و مرنێ و رودانانه و گه‌له‌ك جاران ژی ئه‌ڤ ئه‌كاوانته ب ره‌نگه‌كێ خه‌له‌ت و ترسناك به‌لاڤ دكه‌ن و گۆت: (بۆ نمونه ته‌فاسیلێن مرنا وی كه‌سی هه‌موویان دێ به‌لاڤ كه‌ن یان ژی به‌لاڤكرنا وێنه‌ێن نه‌ره‌وا، یان برینێن ل سه‌ر له‌شی وان ، یان دێ بینین كه‌سه‌كێ نه‌خوشه و ل بن چاڤدێریا چردایه دێ وینێ وی كه‌سی ژی به‌لاڤكه‌ن و بێژن لاڤایان بۆ بكه‌ن یێ نه‌خوه‌شه و گۆت: (مه گه‌له‌ك كه‌س هه‌نه وی بخوه ئاریشێن ده‌رونی هه‌نه و هه‌كه بچیته دناڤ سوشیال میدیایێ دا و ڤان ده‌نگ و باسان بینت دێ پتر كارتێكرن ل سه‌ر لایه‌نێ وی یێ ده‌رونی بیت).
