كچێن سه‌نحاریب رێزا سێیێ ل سه‌ر ئیراقێ ب ده‌ستڤه ئینا
ئه‌ڤرۆ، قه‌یس وه‌یس
تیما باسكێت بۆلا یانا سه‌نحاریب نوونه‌را پارێزگه‌ها دهۆكێ شیا رێزا سێیێ ل سه‌ر ئاستێ قاره‌مانیا ئیراقێ بۆ كچان ب ده‌ستڤه بینت پشتی ب سه‌ركه‌فتی ل سه‌ر هه‌ڤڕكا خوه یانا ئه‌فرۆدێت ب 52 خالان به‌رامبه‌ر 22 خالان، د هه‌ڤڕكیێن واندا ئه‌وا ل ئه‌ینیا بوری باژێرێ سلێمانیێ مێڤانداریا وێ كری و یانا غاز ئه‌لشیمال ناسناڤێ قاره‌مانیێ ب ده‌ستڤه ئینایی و ده‌ربه‌ندیخان رێزا دویێ هات.
ل دۆر ڤێ یه‌كێ داود ره‌به‌ن سه‌رۆكێ یانا سه‌نحاریب بۆ رۆژناما ئه‌ڤرۆ گۆت: سه‌رباری ئارمانج و هیڤیێن مه ده‌ستڤه ئینانا ناسناڤی بوون، ژبه‌ركو باشترین تیم و رێكخستی یا مه بوو، لێ خوه‌ڤه‌كێشانا دو یانا و دۆباره پشككێشانا قاره‌مانیێ كارتیكرن ل سه‌ر پلان و به‌رنامێ مه هه‌بوو و هه‌روه‌سان دماوێ هه‌ڤڕكیان دا تیمه‌كا دی خوه ڤه‌كێشا ئه‌ڤچه‌نده ژی بوو ئه‌گه‌ر ئه‌و زاخ و رژدیا یاریزانێن مه وه‌كو یا ده‌ستپێكێ نه‌ما، ژ شه‌ش یاریان شیاین پێنچ سه‌ركه‌فتن بینن و ئه‌و خوساره‌تیا هاتیه تۆماركرن بتنێ جووداهیه‌كا كێم بوو و خه‌له‌تیێن نه پێشبینیكری بوون، وه‌كو نوونه‌را پارێزگه‌هێ شیان باشترین شێوه ب كچێن باژێرێ خوه هه‌ڤڕكیێ د قاره‌مانیا ئیراقێ دا بكه‌ین سه‌رباری ئاسته‌نگێن كه‌فتینه د ڕێكێ دا و تیما مه ب پێكهاتیه‌كێ نوو.
بۆ زانین قاره‌مانیا ئیراقێ ل سه‌ر ئاستێ تازه‌پێگه‌هشتیان بۆ كچان ل باژێرێ سلێمانیێ دهاته كرن، ژ 13 یانێن به‌رهه‌ڤیا خوه دیاركرین بۆ هه‌ڤڕكیان بتنێ 10 یانا پشكداری كرن و هاتبوونه به‌لاڤكرن ل سه‌ر دو كۆمان.
