كچێن كوردستانێ میدالیێن رەنگین د قارەمانییا رۆژئاڤا ئاسیا دا ب دەستڤە ئینان
قەیس وەیس:
ب دەستڤە ئینانا میدالیێن رەنگین چار یاریزانێن كچ ژ هەرێما كوردستانێ شیان ناسناڤەكێ نوو ل سەر نمرەیێن خوە یێن كەسوكی و هەلبژارتیێ ئیراقێ تۆماربكەت پشتی شیایین ل رێزێن ئێكێ هەتا سێیێ بۆ بەریكانەیێن جودا، د هەڤڕكیێن قارەمانییا رۆژئاڤا ئاسیا یا یاریێن گۆرەپانێ ئەوا دوهی ب پشكدارییا 13 هەلبژارتیێن ل یاریگەها بەسرا یا ئۆلمپی ب دووماهی هاتین.
هەر ئێك ژ ئەڤین مستەفا كچا پارێزگەها دهۆكێ و هەلبژارتییا ئیراقێ بۆ بەریكانا 400م ئاستەنگ شیا رێزا سێیێ بهێت و میدالییا برۆنزی ب دەستڤە بینت ب ئێك خولەك و پێنج پشكەك ژ چركەكێ، هەروەسان دیانا داود كەریم د هەڤڕكیێن بەریكانا 5000م میدالییا زیڤی ب دەستڤە ئینا پشتی شیایی ب دەمێ 19 خولەك، 11 چركە و 12 پشك ژ چركێ رێزا دویێ بهێت، دیسان كوردستان بامۆ وەكو سێیەم كچا كوردستانی شیا د بەریكانەیا 100م ئاستەنگ رێزا ئێكێ بهێت و میدالییا زێری ب دەستڤە بینت.
بۆ زانین ئەڤ چالاكییە دبیتە ئێكەم قارەمانییا نێڤدەولەتی یا یاریێن گۆرەپانێ پشتی بورینا 45 سالان ل ئیراقێ بهێت كرن.
