كچێن گاره دێ بۆ ده‌ربازبوونێ و ناسناڤی هه‌ڤڕكیێ كه‌ن
ئه‌ڤرۆ،
چاڤه‌ڕێ دهێته كرن ل ئه‌ینیا بهێت تیما فۆتسالا كچێن یانا گاره ده‌ست ب كاروانێ خوه یێ وه‌رزێ نوو د خولا پلا ئێكا كوردستانێ بكه‌ت ژبۆ ده‌ربازبوون بۆ پلا نایاب ده‌مێ ل هۆلا گرتیا چالاكیێن وه‌رزشی ل په‌روه‌ردا دهۆك مێڤانداریا كچێن یانا هێرش بكه‌ت.
لدور دووماهی به‌رهه‌ڤی و ئارمانجێن یانا گاره ئاراز سالح راهێنه‌رێ فۆتسالا كچان بۆ رۆژناما ئه‌ڤرۆ گوت: هه‌ر ل ده‌ستپێكا هاتیمه راسپاردن ژلایێ كارگێریا یانێ ڤه وه‌كو راهێنه‌رێ تیمێ مه ئێك ئارمانج و پلان دانایه و دێ رژدبین ل سه‌ر ڤێ یه‌كێ، له‌ورا سه‌رۆكێ یانێ ب هه‌موو شیانێن خوه به‌رهه‌ڤی دیاركریه كو یا د شیان دا بیت و پێدڤی بۆ سه‌ركه‌فتنا كاروانێ تیمێ بكه‌ت و رێك بوو مه دانا كو چو یاریزانێ د خزمه‌تا تیمێ دا بن دشێن ل سه‌ر تیمێ زێده‌بكه‌ین، له‌ورا د ماوێ بوری دا مه چه‌ند لڤینێن به‌رده‌وام كربوون ژبۆ دروستكرنا تیما فۆتسالێ كو ژ كچێن باژێرێ دهۆكێ و شنگالێ و ده‌وروبه‌رانه و دیسان زێده‌كرنا یاریزانه‌كا پیشه‌كار ره‌كه‌ز عه‌ره‌ب ژبۆ وه‌رگرتنا شاره‌زاهیێ كو رۆژانه راهێنانێن خوه ئه‌نجامبده‌ین، كاروانێ مه بێی ئاسته‌نگ نابن لێ گه‌شبینم ب ڤان یاریزانان و پشته‌ڤانیا كارگێریا یانێ نه بتنێ پشكداربین به‌لكو هه‌ڤڕكیێ ل سه‌ر ناسناڤێ خولێ و ده‌ربازبوونێ بۆ پلا نایاب بكه‌ین، ئه‌ڤچه‌نده ژی ب سانه‌هی نابیت لێ رژدین وه‌كو یانا گاره نوونه‌راتیا سه‌ركه‌فتیانه بۆ پارێزگه‌ها دهۆكێ بكه‌ت.
بۆ زانین خولا پلا ئێكا فۆتسالا كچان ده‌ه یانه پشكدار بووینه و هاتینه به‌لاڤكرن لسه‌ر دو كۆمان ژ هه‌ر كۆمه‌كێ دو یانه دێ ده‌ربازبنه قۆناغا چارگۆشا زێرین، سه‌ركه‌فتیێ ئێكێ و دویێ دێ بۆ پلا نایاب هێنه زێده‌كرن، یانا گاره د كۆما دویێ دا یه و یاریێن خوه دێ بشێوێ خول ئێك قۆناغ كه‌ت، تیمێن دناڤ كۆما وێ دا ئه‌وژی، هێرش، سنوور، رانیه و سۆلاڤ.
