كچەكا دهۆكێ بوو شاها شەترەنجا ئیراقێ
پشتی ڤەقەتیانەكا دریژ كچا پارێزگەها دهۆكێ دلین كەمال جەلالەددین بوو شاها شەترەنجا ئیراقێ و ناسناڤێ مەزنترین قارەمانی ل سەر ئاستێ ئافرەتان ب دەستڤە ئینا و ل رێزا ئێكێ هاتی، د هەڤڕكیێن واندا ئەوا ل ئەینیا بۆری ب پشكدارییا 60 باشترین یاریزانێن كوڕ و كچ د ژیێن جودا ل باژێرێ رومادی بۆ ماوەیێ حەفت رۆژان ل دووڤ سیستەمێ سویسری نێڤدەولەتی حەفت گەڕان دهاتە كرن.
دلین كەمال شیا ب كۆمكرنا حەفت خالان ناسناڤێ ئیراقێ ب دەستڤە بینت وەكو باشترین یاریزان بۆ قونا‌غا دووماهیێ یا هەلبژارتیێ ئیراقێ بهێتە ژێگرتن، پێشكەڤیت ژ هەڤڕكا خوە و یاریزانا هەلبژارتییا ئیراقێ لەنیا سەلاح ئەوا شەش خال و نیف كۆمكرین و یاریزانا دویێ یا ئیراقێ بەهرا سەمیر شەش خالان رێزا سێیێ هات، دیسان كچا پارێزگەهێ شیان هەلسەنگاندنا یارییا ب لەز رێزا ئێكێ ب دەستڤە بینت ب كۆمكرنا 1393 خالان و هەڤڕكا وێ یا دویێ ب 1309 خالان دووڤدا هات.
ل دۆر ڤێ دەستكەفتێ قارەمانا ناڤهاتی بۆ رۆژنامەیا ئەڤرۆ گۆت: ئەڤ قارەمانییە ل سەر ئاستێ باشترین یاریزانێن كچ هاتییە كرن ژبۆ ژێگرتنا پێنچ یاریزانان بۆ قونا‌غا دووماهیێ بەر ب رێزێن هەلبژارتیێ ئیراقێ خوە بەرهەڤكرن بۆ قارەمانیێن نێڤدەولەتی و عەرەبی، هەروەسان پلەكرنا یاریزانێن كچ و كوڕ بۆ وەرزێ 2023ێ، پێخوەشحالم پشتی ڤەقەتیانەكا درێژ ڤەگەڕیامە پێشەنگیێ و ناسناڤی، دیسان وەكو كچا پارێزگەها دهۆكێ و كوردستان ئێكەم بم، و رژدم قونا‌غا دووماهیێ جهێ خوە دناڤ رێزێن هەلبژارتیێ ئیراقێ دا پارێزم.
