كچەكا كوردستانی گرێبەستا نەسرا سعودیێ ئیمزاكر
ب فەرمی كچا كوردستانی و هەولێرا پایتەختی شۆخان نورەددین گرێبەستا یانەیا نەسر یا سعۆدیێ ئیمزاكر ژبۆ پشكداریێ دگەل تیما وان یا فوتبۆلێ و فوتسالێ بۆ وەرزێ نوو 2025-2026ی یا خولا رۆشن و خوە بەرهەڤكرن بۆ قارەمانیێن عەرەبی و ئاسیایی.
رۆژنامەیا ئەلیەوم یا سعۆدیێ بەلاڤكرییە، كو پشتی دانۆستاندنێن بەردەوام ل دووماهیێ یانەیا نەسر شیا ستێرا خولا سعۆدیێ و یاریزانا یانەیا هیلال ڕازیبكەنن ژبۆ ئیمزاكرنا گرێبەستا وان ئەوا دێ بۆ ماوەیێ دو سالان بەردەوامبیت ب مووچەیەكێ بلن دبێ بهێتە دیاركرن، بڕیارە د ڤێ حەفتیێ دا بگەهیتە سعۆدیێ ژبۆ ئیمزاكرنا گرێبەستا خوە و دەست ب ڕاهێنانان بكەن.
شۆخان نورەددین كچا كوردستانی پێشتر یاری بۆ یانەیێن ئافرەتێن هەولێن و یانەیا ئافرەتێن دهۆك كرییە د خولێن ئیراقێ و كوردستانێ دا و بوویە گۆلكەرا خولا ئیراقێ و جارەكێ یا كوردستانێ، دیسان دگەل یانەیا هیلال یا سعۆدیێ بوو گۆلكەرا خولێ ل وەرزشێ 2022-2023ێ 43 گۆل تۆماركربوون، دگەل هەلبژارتیێ ئیراقێ گۆلكەرا قارەمانیا رۆژئاڤا ئاسیا بوو ب هەشت گۆلان.
د پۆستەكێ خوە یێ ئینستگرامێ دا شۆخان نورەددینێ نڤێسایە، پشتی سێ سالێن نا هێنە ژبیركرن، دەمێ خاتر خواستنێ هات، سۆپاسییا یانەیا هیلال دكەم پشتەڤان و هاریكاربوون، ئەڤ خاتر خاستنە یا دووماهیێ نینە بەلكو دەستپێكەكە بۆ پێنگاڤەكا نوو ل خولا سعۆدیێ.
بۆ زانین ل وەرزێ 2023-2024 شۆخان نورەددین گرێبەست دگەل یانەیا ئافرەتێن دهۆكێ ئیمزاكربوو ژبۆ پشكداریێ دگەل تیما وان یا فوتسالێ د خولا كچێن كوردستانێ دا لێ ژبەر پێگێرییا وێ ب یانەیا ئەلهیلال یا سعۆدیێ بەردەوامی نە تیمێ سەرباری دو یاری د خولێ ژی دا ئەنجام دابوون، ئەوا تیما ئافرەتێن دهۆكێ شیانین د وی وەرزی دا ناسناڤی خولێ ب دەستڤە بینن.