كچەكا كورد بوو شاهجوانا ئەلمانیا
دلڤین رەشید
دوعا فارس، كو خەلكا باژیرێ قامشلۆ یە ل رۆژئاڤایێ كوردستانێ و ئەڤە چەند سالن ل وەلاتێ ئالمانیا دژیت، ل رۆژێن بۆری وەكو شاهجوانا وی وەلاتی بۆ سالا 2026 هاتە هەلبژارتن و ئەڤە جارا ئێكێ یە د دیرۆكێ دا ژنەكا كورد دناڤ زێدەتر ژ (2000) كەسان دهێتە هەلبژارتن و شیا وی ناسناڤی ب دەستخۆڤە بینیت.
ناڤهاتیێ، د دیدارەكێ دا بۆ رۆژنامەیا ئەڤرۆ گۆت: دوێ بەریكانەیێ دا كو زێدەتر ژ (2000) كچ و ژنان پشكدار ببوون، بەلێ ژبەرجوانی و كەسایەتی و شیانێن من، ئەز شیام دناڤ وان هەموویان دا سەربكەڤم و ئەڤی ناسناڤی ب دەستخوڤە بینم ، ئەڤ سەركەفتنە بۆ من و هەموو كوردان جهێ شانازی و خۆشحالیێ یە.
هەروەسا گۆت: سەركەفتنا من دوێ بەریكانە یێ دا دێ بیتە نموونەیەكا باش ژبۆ گەنجان و بتایبەتی ژی كچا كورد ژبۆ هندێ باوەری ب خۆ هەبیت و بزاڤان بكەن ژ بۆ گەهاندنا خەون و ئارمانجان، ئەوێ بەریكانە یێ ئەو چەندە نیشادا كو ژنێن كورد دشێن د جیهانێ دا دەستكەفتێن گرنگ ب دەستخۆڤە بیننن و بۆارێن نوو بۆ نفشێ بهێن ڤەكەن.
