كچەكا گەنج خوەبەخشانە رێكخراوەك دامەزراندیە
بێوار حەمدی:
ئیلاف خەیرەددین، بەرپرسا رێكخراوا رۆژینە ل باژێرێ دهۆكێ، ژ بەر نەبوونا پشتەڤانیێ ب خوەبەخشانە كاردكەن و بۆ رۆژناما ئەڤرۆ دبێژیت: رێكخراوا مە ل سەر سێ تەوەرێن سەرەكی كاردكەت و ئەم چاڵاكیێن جوراوجور ئەنجام ددەین، ژ بۆ داهاتی ژی هەموو پلانێن مە گرێدای گەنجانە، ژ بەر كۆ گەنج پاشەڕوژا مللەتی نە، پڕۆژەیەكێ مەزن د پلانا مە دایە و ئەز د وێ باوەرێ دا مە گەلەك گەنج دێ ژێ مفادار بن.
ئیلاف خەیرەددین، كچەكا گەنجا باژێرێ دهوكێ یە د دیدارەكێ دا بۆ رۆژناما ئەڤرۆ گۆت: مە رێكخراوا رۆژین ل ساڵا 2021 دەمەزراندیە و ئەڤ رێكخراوە بەهرا پتر د وارێ گەشەپێدانا مرۆڤی دا كاردكەت، بەلێ ژبەر نەبوونا پشتەڤانیا دارایی، مە هەر ژ دەسپێكێ ب خوەبەخشانە كاركریە و ژ پرۆژەیێن بچووك دەستپێكریە و گۆت: (ژبلی كارێ رێكخراوێ نوكە ئەز قوتابیا ماستەرێ مە ل پەیمانگەها چارەسەریا دەروونی و زانستێ تراومایێ ل زانكۆیا دهوك ب هەماهەنگی دگەل زانكۆیا توبینگن یا ئەلمانی).
ئیلافێ دیاركر ژی، رێكخراوا رۆژین ل سەر سێ تەوەرێن سەرەكی كاردكەت، ئەو ژی (وارێ گەشەپێدانا مرۆڤی، دەرونناسی، ژینگەهێ) ژلایێ گەشەپێدانا مرۆڤی ڤە مە گرنگی دایە لایەنێ پەروەردێ و ئاڤاكرنا قوتابیەكێ ساخلەم و ژلایێ دەرونی ڤە مە پتر گرنگی دایە ئاڤاكرنا تاكەكێ ساخلەم و ب ڕێكا دروستكرنا ڕێبەرێ دەروونی و ل هەمی تاخان هاتە بەڵاڤكرن و دیسان دبوارێ ژینگەهێ ژی دا مە چەندین چاڵاكی ئەنجامداینە ل پارێزگەها دهۆكێ.
د بەردەوامیا ئاخفتنا خۆدا ئیلافێ گۆت: كارێ مە ب گشتی خوەبەخشیە، ئەڤجا چ بۆ پڕوژەیێن بچووك بیت یان یێن مەزن، د ڤێ رێكخراوێ دا ب گشتی ئەم 12 ئەندامین، شەش كەس ژ رەگەزێ مێ و شەش كەس ژ رەگەزێ نێر، ئەڤە ژی ژ بەر هندێ دا كۆ مە بەلانسەك هەبیت و گەنج پتر بشێن مفاداربن و گۆت: (هەر دیسان ب رێكا ڤێ رێكخراوێ مە دەلیڤێن كاری بۆ گەلەك گەنجان رەخساندینە، گەلەك جاران ژی مە هزرێن وان كرینە راستی و كرینە پڕۆژە).
ل دووماهیا ئاخفتنا خۆ ژی گۆت: (ژ بۆ داهاتی ژی هەموو پلانێن مە گرێدای گەنجانە، ژ بەر كۆ گەنج پاشەڕوژا مللەتی نە، پڕۆژەیەكێ مەزن د پلانا مە دایە و ئەز د وێ باوەرێ دا مە گەلەك گەنج دێ ژێ مفادار بن، چونكی سەركەفتنا گەنجان ئانكۆ سەركەفتنا رێكخراوێ و مللەتی یە دناڤ جڤاكی دا).
