كچ ده‌ڤ مچ پشت كوچك!
ئه‌ڤ گۆتنه‌كا مه‌زنایه ل سه‌ر كچا كورد! دێ كه‌ره‌مكه كچا كورد پێشبكه‌ڤه! وه‌ره نیڤه‌كا جڤاكی یا ده‌ڤ مچ بیت و پشت كوچك بیت دێ جڤاك یێ چاوا بیت؟؟؟ بۆچی دڤێت كچ یا ده‌ڤ مچ بیت؟ یا دیاره مه‌زنێن مه ئه‌ڤ مافه نه‌دایێ! هه‌كه خوه زۆری ژی لێ بێته‌كرن دڤێت هه‌ر یا ده‌ڤ مچ بیت, بده شوی و ده‌ڤ مچ, بكوژه ژی ده‌ڤ مچ, نزا كه‌نگی دێ ڤێ كچێ وه‌كی من ده‌ڤه‌ك هه‌بیت باخڤیت و ب ئازادییا خوه بخوڕیت؟ چه‌ند ڕوژێن دی؟ چه‌ند هه‌یڤێن دی؟ چه‌ند سالێن دی؟چه‌ند سه‌د سالێن دی خاتوونێ؟؟؟ تو یا سه‌یری گه‌له‌ك كو تو ژ جڤاكی د ترسی! توً بخوه نیڤا جڤاكی! تو یا دو زینداناندا خاتوونێ ئه‌ڤه هنده سه‌د ساله, بلا ئه‌ز ته د زێریڕا بهه‌لینم لێ تو هه‌ر زیندانی! بلا هه‌ر ته بكه‌مه د قه‌لاتێن بلندڤه تو هه‌ر زیندانیا منی! هندی تویا جوان ژی بی جوانیا ته تنێ یا منه! من تو بخوه یا كڕی ب دوو ده‌فته‌ران! دڤێت ئه‌ز حه‌قێ خوه بده‌ربێخم ئه‌و ته‌مه‌نێ تو ل گه‌ل من! تو بلبلكا منا جوانی د قه‌فه‌سا دلێ منێ پیس دا ئه‌زێ خوشترین زاد و خوارنێ ده‌مه ته لێ ل هیڤیێ نه‌به ئه‌ز ئازادیێ بده‌مه ته بفڕی وه‌كی من ل هنداڤی دهوكێ! ژبه‌ر كو ئه‌سمان تێرا من ته ناكه‌ت ئه‌م تێدا بفڕین! ئه‌ڤه هزرا نێرایه! لێ د زیندانێدا هه‌می گاڤان ده‌لیڤا ڕه‌ڤینی یا هه‌ی! ئو تو نزانی ڤێ چه‌ندێ! تنێ تو دزانی خوه بكوژی و بسۆژی دزیندانێدا هه‌شپێوه‌رێ! ئه‌ڤه نه چاره‌یه ته بخوه گرتی! بخوه سه‌حكه چاره‌كا دی! خوه كوشتن تاوانه و شكه‌ستنه!!نه وه‌بیت تو وه‌بكه‌ی خاتوونێ! باشه ما تو خه‌ونان نابینی كو زه‌لامه‌كی بخوه بكڕی ب ده‌فته‌ره‌كێ!؟؟ یان ژی شوی ب زه‌لامه‌كێ ب ره‌وشتوتیتال بكه‌ی رۆژه‌كێ؟؟ یان ژی ده‌زگرێ خوه ببه‌یه سیكێ بۆ جلكان بكڕی و وه‌كی تو بخوازی بخه‌ملینی!؟؟ گلیزانكێن ته ڤه‌بوون ب ڤێ خه‌ونێ؟ لێ ژبیرنه‌كه خه‌ون دبنه ڕاست! پتریا خه‌ونێن من یێن بووینه راست! به‌س یێن ته نابنێ ژبه‌ركو تویا ل پشت كوچكی! ئه‌ڤه نه به‌هانه‌یه بۆ ته كو یا ده‌ڤ مچ بی! باشترین پشت كوچك ل دونیایێ زه‌لامه! ئه‌م زه‌لام خوشترین خوارن چێدكه‌ین! ئه‌گه‌ر تو باوه‌رنه‌كه‌ی وه‌ره خوارنگه‌هێن باژێری و زادێ ده‌ستێن مه بخوه! بخودێ هه‌تا كاسترێ و كێكا ژی ئه‌م چێدكه‌ین! مه ئه‌و ژی بۆ هنگۆ نه هێلایه! نزا ته چ ماییه ده‌ستێ خوه‌دا به‌رامبه‌ری من؟ به‌حسێ فلان چالاكیا دره‌و نه‌كه ئه‌ڤا من بۆ ته چێكری! به‌حسێ وی باره‌گایێ من بۆ ته ئاڤاكری! به‌حسێ وان كۆنفرانسێن كارتۆنی نه‌كه! ئو به‌حسێ چ نه‌كه ئه‌و هه‌می دره‌ون من تو یا خاپاندی تویا پێ ڕازی بووی! تو تێدا دژی!!! ئه‌ڤا د دلێ خوه‌دا بێژه! هه‌كه تو ئه‌و ژنی!. ئه‌ز وه‌ك زه‌لام وه‌كی باپیرێن خوه دێ بێژمه ته كچ ده‌ڤ مچ پشت كوچك! نه‌رازیبوونا ته ژی وه‌كی وێ عه‌ریزێ یه ئه‌ڤا نه گه‌هیته ده‌ڤ حاكم.
