كڕین و فرۆتنا كه‌ڤالان ل ده‌ف مه د ئاسته‌كێ لاواز دایه
دهۆك، زنار تۆڤی:
شێوه‌كار به‌هزاد تارق، یێ ناسیار ب به‌هزاد ئارت، د دیداره‌كێ دا بۆ رۆژناما ئه‌ڤرۆ دیاركر كو ئه‌و ده‌رچوویێ په‌یمانگه‌ها هونه‌رێن جوانه پشكا شێوه‌كاری، تایێ (په‌یكه‌ری) یه، ل سالا 2002 ل دهۆكێ، ل قووناغا سه‌ره‌تایی هه‌ست پێكریه كو حه‌زا وی بۆ وێنه‌كێشانێ دچیت له‌ورا دژیه‌كێ بچووكدا ده‌ستپێكر و هه‌تا نوكه یێ به‌رده‌وامه.
ناڤهاتی گۆت: حه‌ز و به‌هره بۆ من بوونه پالده‌ر كو رێیا هونه‌ری بگرم، كارێن من یێن هونه‌ری كه‌ڤال و په‌یكه‌ر ب شێوازێ ژیواری بووینه و هه‌تا نوكه من شێوازێ نووخوازیێ یێ تایبه‌ت نینه و و وهه‌كه ئه‌م هه‌ڤبه‌ركرنه‌كێ بكه‌ین دناڤبه‌را نوكه و به‌ری چه‌ند سالان دا بێگومان جۆداهی هه‌یه و به‌رب پێشڤه‌چوویه، به‌لێ ئه‌ڤه به‌س نینه، چونكو جیهان ژ هه‌موو روویه‌كێ ڤه د پێشكه‌فتنێ دایه، هه‌كه بزاڤ و پشته‌ڤانی نه‌بیت، دێ هونه‌ر ل ده‌ف مه لاوازیه‌كێ ب خوه ڤه بینیت، هونه‌ر ده‌ریایه‌كا مه‌زنه و چو سنور نینن، و هه‌تا نوكه هونه‌ر د گوهۆرین و پێشكه‌فتنێ دایه، بۆ زانین من پشكداری د چه‌ندین پێشانگه‌هێن هه‌ڤپشكدا كریه ب كه‌ڤال و په‌یكه‌ران، و ڤه‌كرنا پێشانگه‌هان گه‌له‌كا گرنكه بۆ به‌رفره‌هكرنا هزرا و پشته‌ڤانه بۆ هونه‌رمه‌ندی خوه ب گوهۆریت، داخواز ژمن هاتیه كرن كه‌ڤالێن خوه بفرۆشم به‌لێ رازی نه‌بووم، چنكو كڕین و فروتنا كه‌ڤالان ل ده‌ف مه د ئاسته‌كێ لاواز دایه، ئه‌ڤه بۆ وێ چه‌ندێ دزڤریت، كو هێشتا ره‌وشه‌نبیریا هونه‌ری ل ده‌ف خه‌لكێ نینه و چو بهایی ناده‌نه هونه‌ری، و ژ ده‌سپێكا هاتنا كۆرۆنایێ و هه‌تا نوكه من چو كارێن هونه‌ری ئه‌نجام نه داینه.
