كۆمارا كوردستان ب دله‌كێ بریندار یا دنالیت ژ ١٦ ئۆكتوبه‌رێ
محه‌مه‌د ئیبراهیم ئامێدی
مانشیت
(ژ ئه‌گه‌رێ خیانه‌تكاریا وان كه‌س و لایه‌نان، سۆز و په‌یمانێن پالپشتیێ ل گه‌ل كۆمارێ گۆتین بجهنه‌هاتن)
ئه‌ڤرۆ (٢٢) كانوونا دویێ بیره‌وه‌ریا (٧٢) سالیادا دامه‌زراندنا كۆمارا كوردستان ل مهاباد ل(٢٢/١/١٩٤٦)، ل ژێر ئالایێ كوردستانێ یێ پیرۆز، ب سه‌رۆكاتیا پێشه‌وا قازی محه‌مه‌د، یا پێكهاتیبوو ژ (١٢) وه‌زاره‌تان و بنیاته‌كێ ب هێزبوو له‌شكرێ كۆمارێ بۆ پاراستنا خاكا وه‌لاتی، سه‌ركرده و به‌پرس و رێبه‌رێن ده‌وله‌تێ هاتبوونه دیاركرن و ئاماده‌كرن، كو رۆلێ بارزانیێ نه‌مر مسته‌فا وه‌ك جه‌نه‌راله‌كێ سوپایی و سه‌ركرده‌كێ موحه‌نه‌ك یێ گرنگ و دیرۆكی، ژماره‌كا پرۆژێن گرنگ و ستراتیژی د گه‌له‌ك وار و بیاڤان دا، نه‌خشه و پلان بۆ هاتبوونه دانان، لێ نه‌هاتنه جێبه‌جێكرن، ژ به‌ر ژیێ كۆمارێ یێ كورت بوو (١١) هه‌یڤ و (١١) رۆژبوون، ژ ئه‌گه‌رێ خیانه‌تكاریێ ژ لایێ وان جه و كه‌س و لایه‌نان، سۆز و په‌یمانێن پالپشتێ و هاریكاریێ ل گه‌ل كۆمارێ گۆتین بجهنه‌ئینان، كو پشتی هنده‌ك رێككه‌فتنا د ناڤبه‌را ده‌وله‌تێن مه‌زن دا هاتینه مۆركرن و ئێكه‌تیا سۆڤیێت یا به‌رێ، ژ به‌ر به‌رژه‌وه‌ندیا خوه یا پترۆلێ، سۆز و هه‌لویستێ خوه گوهۆری و پشتا خوه دا كۆمارێ و ئه‌و چه‌نده پشتگوهێ خوه‌ڤه هاڤێت و كۆمار هاته هه‌لوه‌شاندن ل (٣١/٣/١٩٤٧) پێشه‌وا قازی محه‌مه‌د و برایێ وی سه‌یفی و كورمامێ وی سه‌دری هاتنه سێداره‌دان سه‌رده‌ستێ رژێما شاهنشاهی، خه‌ما قازی محه‌مه‌د دو كاربوون، ئێك پاراستنا ملله‌تێ وی ل مهابادێ، یێ دوویێ پاراستنا ئالایێ كوردستانێ كو ل رۆژا١٦/١٢/١٩٤٦ راده‌ستی بارزانیێ باب كر. هه‌روه‌سا باشی چار ئه‌فسه‌رێن كۆمارێ ژ لایێ حوكمه‌تا عیراقێ یا شاهنشاهی هاتنه سێداره‌كرن، عزه‌ت عه‌بدولعه‌زیز ـ مسته‌فا خۆشناف ـ مه‌حموود قودسی ـ خه‌یری عه‌بدولكه‌ریم و بارزانیێ نه‌مر مسته‌فا ل گه‌ل (٥٠٠) خورته مێران، نه‌چاربوون به‌ر ب ئێكه‌تیا سۆڤێتی ڤه چوون، ل ڤێره دا و ب دیتنا من مخابن ئه‌ڤرۆ دیرۆك یا خوه دوباره دكه‌ت. سه‌ربۆره‌كێ ته‌حل و هه‌ستیار مه یێ هه‌ی د ڤی بیاڤی دا. له‌ورا ئه‌ڤرۆ ب ڤێ هه‌میێ ڤه و وێ كاره‌ساتێ و هه‌لوشاندنا كۆمارێ. كۆمارا كوردستان ل مهاباد یا دنالیت ب دله‌كێ پڕكۆڤان و بریندار ژ (١٦) ئوكتوبه‌رێ و یا دكه‌ته هه‌وار و گازی یا دبێژیت: من حه‌یف و مخابن بۆ وێ رۆژێ و شه‌رمزاری بۆ خیانه‌تكاران، ئه‌ی گه‌لێ كورد مانه‌به‌سه دێ ببنه ئێك، د سه‌نگه‌ره‌كێ موكوم و خورستی دابن، ب ئێكرێزی و ئێك گۆتارا سیاسی و ب ئێك ده‌نگ و هه‌لویست و تفاق ببنه كه‌لها پیلای ل به‌رانبه‌ری ره‌گه‌زپه‌رست و شۆفینیان و هه‌موو دوژمنێن كوردان، بلا په‌یڤا بارزانیێ نه‌مر مسته‌فا ببیته دوورشمێ ڤێ قووناغێ ل ده‌مێ فه‌رمۆی و گۆتی (ل سه‌ركه‌فتنا مه‌غرۆر نه‌بن و ژ شكه‌ستنان بێ ئومێد نه‌بن). ئه‌ڤچا ماده‌مكی ئه‌م كورد خودان ژماره‌كا مه‌زن یا ره‌گه‌ز و بنه‌مایێن ده‌وله‌تبوونێ و سه‌ربه‌خوه‌یێ نه بێ ئومێدنابین. وه‌ك/ خاك ـ وه‌لات ـ نیشتیمان ـ ژمارا كوردان ـ زمان ـ ئالا ـ پێشمه‌رگه ـ سروودا ئه‌ی ره‌قیب ـ شه‌هیدێن نه‌مر ـ عه‌گید و خورته‌مێر و سه‌ركرده ـ شۆره‌ش و داستانا ـ ده‌وله‌ت و میرنشین ـ سه‌رسال و نه‌ورۆزـ پارت و لایه‌نێن سیاسی ـ سه‌ندیكا و رێكخراو ـ زانكۆ و په‌یمانگه‌ه و قوتابخانه ـ میدیا و رۆژناڤانی ـ زانا ـ ئایین وعه‌قیده ـمێژووڤان ـ نڤیسه‌رو هه‌لبه‌ستڤان ـ هونه‌رو هونه‌رمه‌ند ـ كه‌لتۆر و كه‌له‌پۆرێ كه‌ڤنار و ره‌سه‌ن، دبلوماسیه‌ت، چاندن، ژینگه‌هه‌كێ باش، پیشه‌سازی، سه‌رهلدانا ١٩٩١، كۆچا ملیۆنی یاملله‌نێ كورد، په‌یمان و رێكه‌فتن و شه‌رعیه‌ت و یاداشتنامێن دوه‌لی، په‌رله‌مانێ هه‌لبژارتی، حوكمه‌تا هه‌رێما كوردستانێ و جڤاتا وه‌زیران ـ ئاژانسا پاراستنا ئاسایشا هه‌رێما كوردستانێ ـ باوه‌رناما ریفراندۆمێ یا ئیرادا ملله‌تێ كورد ل (25/9/2017).. هتد. لێ یا هه‌ره‌گرنگ و یا هه‌ره گرنگ تفاق و تفاق و ئێكرێزیێ و ئێكرێزی بژیت بیره‌وه‌ریا (72) سالی و دێ مینیت كۆمارا مهاباد هێڤێنێ سه‌ربه‌خوه‌یێ، سلاڤ ل سه‌ر گیانێ پاكێ شه‌هیدێن كۆمارا كوردستان ل مهاباد و ته‌ڤایا شه‌هیدێن كورد و كوردستانێ.
