كۆمبوونا ئێكێ یا خولا نوو یا جڤاتا نوونەرێن ئیراقێ ل دووماهییا ڤێ مەهێ دێ هێتە ئەنجامدان
سەرۆككۆمارێ ئیراقێ رۆژا كۆمبوونا ئێكێ یا خولا نوو یا جڤاتا نوونەرێن ئیراقێ دیاركر، كو 29/12/2025 یە. دیاركرنا وێ رۆژێ ب مەرسوونا كۆمارییا لەتیف رەشید، سەرۆككۆمارێ ئیراقێ بوو، كو تێدا داخواز ژ ئەندامێن خولا شەشێ یا جڤاتا نوونەرێن ئیراقێ كریە، ئێكەمین كۆمبوونا خوە ل وێ رۆژێ بكەن، كو دێ ب سەرۆكایەتییا ب تەمەنترین ئەندام بیت. ئەو پێرابوونا سەرۆككۆماری ب گۆڕەی مادەیا 54 ژ دەستوورێ ئیراقێیە، كو دڤێت د دەمێ 15 رۆژاندا ژ پەسەندكرنا ئەنجامێن دووماهیێ یێن هەلبژارتنان ژ ئالیێ دادگەها بلند یا فیدرالی ڤە، سەرۆككۆمار داخوازێ ژ ئەندامێن نوو یێن جڤاتا نوونەران بكەت ئێكەمین كۆمبوونا خولا نوو یا جڤاتا نوونەران بكەن. د كۆمبوونا ئێكێ یا جڤاتا نوونەرێن ئیراقێدا، دڤێت سەرۆكێ جڤاتا نوونەرێن و جێگرێن ئێكێ و دویێ یێن سەرۆكێ جڤاتا نوونەران بهێنە هەلبژارتن، وەك پێنگاڤا ئێكێ یا كارابوونا خولا نوو یا جڤاتا نوونەران و پێكئینانا كابینەیا نوو یا حوكمەتا ئیراقا فیدرال. د كۆمبوونا ئێكێ یا جڤاتا نوونەرێن ئیراقێدا ئەندامێن نوو یێن جڤاتێ دێ سووندا قانوونێ خوونن بۆ دەستبكاربوونا وان، هەكە ئەندامەك ژی د وێ كۆمبوونێدا بەرهەڤ نەیت، د شێت د كۆمبوونەكا دی دا سووندێ ب خوونیت. ب گۆڕەی پێرابوونێن دەستووری، پشتی هەلبژارتنا سەرۆكێ جڤاتا نوونەران وهەردو جێگرێن وی، دڤێت د دەمێ سێ رۆژاندا دەرگەهێ خوە بەربژاركرنێ بۆ بەربژارێ سەرۆككۆماری بهێتە ڤەكرن و د دەمێ 30 رۆژاندا سەرۆككۆمارێ نوو بهێتە هەلبژارتن.