كۆمبوونا نێچيرڤان بارزانى نوونه‌رێن كورد ل به‌غدا يا به‌رده‌وامه
ئه‌ڤرۆ نيوز:
ئه‌ڤرۆ رۆژا چارشه‌مبى رێكه‌فتى 13ى گۆلانا 2015ێ نێچيرڤان بارزانى، سه‌رۆكێ حوكمه‌تا هه‌رێما كوردستانێ و نوونه‌رێن كورد يێن ل عيراقێ ل هه‌ولێر يێ د كۆمبوونه‌كێ دا و بڕياره هه‌لويستێ خوه ل دۆر ره‌فتارا به‌غدا و كێمكرنا بودجا هه‌رێما كوردستانێ ده‌رببڕن.
ل 6ى گۆلانا 2015ێ حوكمه‌تا عيراقێ بڕيار دا 543 مليار ديناران وه‌كو پشكا هه‌رێما كوردستانێ ژ بوجێ بۆ هه‌يڤا ئادارێ ره‌وانه بكه‌ت و ب ڤێ چه‌ندێ ژى حوكمه‌تا هه‌رێمێ نه‌ره‌حه‌تيا خوه ل دۆر ڤێ چه‌ندێ ده‌ربڕى بوو ب به‌هانه‌يا وێ چه‌ندێ كو نه ل دووڤ ئاستێ فرۆتنا په‌ترۆلا هه‌رێمێ بوو، به‌لێ حه‌يده‌ر عه‌بادى يێ سه‌رۆك وه‌زير ب ڤێ چه‌ندێ ژى رازى نه‌بوويه و داخواز ژ وه‌زاره‌تا دارايى كريه وى پاره‌يى ژى ب نيڤى بكه‌ن، به‌لێ هشيار زێبارى رازى نه‌بوويه و ب تنێ رێ دايه 10% ژ وى پاره‌يى بهێته بڕين.
چاڤدێر ژى ڤێ بزاڤێ ب دووباره تێكچوونا په‌يوه‌نديان د ناڤبه‌را هه‌رێم و به‌غدا دا دده‌نه زانين و بۆ ڤێ مه‌ره‌مێ ژى بڕياره ئه‌ڤرۆ ئێڤارى يان سوبه‌هى، وه‌زيرێ په‌ترۆلا عيراقێ عادل عه‌بدولمه‌هدى بگه‌هيته هه‌رێما كوردستانێ و ل گه‌ل نێچيرڤان بارزانى كۆم ببيت.
ب گۆره‌يى ئه‌و پێزانينێن ل به‌ر ده‌ستێ ئه‌ڤرۆ نيوز، ئه‌ڤ كۆمبوونه دێ يا تايبه‌ت بيت ب دانوستاندنێ ل سه‌ر ئه‌و كێشێن د ناڤبه‌را هه‌رێما كوردستانێ و عيراقێ دا هه‌ين و بڕياره هه‌لويستێ خوه ژى ل سه‌ر ڤێ پرسێ بده‌نه دياركرن.
نێچيرڤان بارزانى يێ سه‌رۆكێ حوكمه‌تا هه‌رێما كوردستانێ د ماوێ ڤان چه‌ند رۆژێن بۆرى دا چه‌ندين جاران راگه‌هانديه كو ئه‌و گرنگيه‌كا مه‌زن دده‌ته رێكه‌فتنا هه‌ولێر و به‌غدا و بزاڤێ دكه‌ت سه‌ر بگريت و ژ هه‌ردو لايان ڤه پێگرى پێ بهێته كرن.
