كۆمبوونەكا تایبەت ل دۆر پاراستنا ژینگەهێ و پاقژڕاگرتنا جهێن گشتی هاتە كـرن
ل دووڤ راسپاردەیێن مەسرور بارزانی، سەرۆكێ حكومەتا هەرێما كوردستانێ ژ بۆ پاراستنا ژینگەهێ و پاقژڕاگرتنا جهێن گشتی، دوهی 21/9/2025 د. عەلی تەتەر، پارێزگارێ دهۆكێ سەرپەرشتیا كۆمبوونەكا تایبەت ل گەل هەر شەش دەڤەردارێن پارێزگەها دهۆكێ و ریڤەبەرێن پەیوەندیدار كر.
د كۆمبوونێ دا بەحسێ گرنگیا پاراستنا ژینگەهێ و پاقژڕاگرتنا جادە و كۆلانێن ناڤ باژێڕ و گوندان و جهێن گشتی هاتە كرن.
پارێزگارێ دهۆكێ دوپاتكر كو ل دووڤ راسپاردەیێن مەسرور بارزانی، سەرۆكێ حكومەتا هەرێما كوردستانێ دڤێت ل سەر ئاستێ هەموو دەڤەرداری و ناوچەداری و رێڤەبەریێن پەیوەندیدار گرنگی ب پاقژیێ و پاراستنا ژینگەهێ بهێتەدان و روویێ جوان یێ دەڤەرێ كو پاقژی و ژینگەهـپارێزی پشكەكە ژ كلتوورێ جوانێ وەلاتێ مە باشتر بهێتە دیاركرن.
پاش گەنگەشێن تێروتەسەل ل سەر بابەتی هاتنە كرن و چەندین بڕیار و رێنما هاتنە دەركرن دا ژینگەها دەڤەرێ پتر بهێتە پاقژكرن و پاراستن.
ژوان رێنما و بڕیاران:
1- دیاركرنا جهێن تایبەت ل سەرجادەیێن سەرەكی و لاوەكی بۆ وێ یەكێ خودانێن مەزرەعا و سەیرانی گلێشێ خۆ یێ رۆژانە دانە وان جها.
2- كۆمپانیێن راكرنا گلێشی ب ئەركێ خۆ یێ دەستنیشانكری رابن و بەردەوامیێ ب دەنە كارێ پاقژكرنێ ل دووڤ پیڤەر و كوالیتیێن دەستنیشانكری.
3- دەزگەهێن پەیوەندیدار بەردەوام دووڤچوونا سەرپێچیكاران بكەن.
4- پشتی جهێن تایبەت بۆ دانانا گلێشی دهێنە دیاركرن، دڤێت دەزگەهێن راگەهاندنێ و رێڤەبەریێن پەروەردێ و فەرمانگەهێن دی، وەكوك زانكۆ و ئێكەتیا زانا و ئەوقاف و دەزگەهێن حزبی و رێكخراوێن جەماوەری و ژینگەهدوست هشیاریا جڤاكی و هەوەكا نیشتیمانی د ناڤ خەلكێ دەڤەرێ دا بەلاڤ بكەن، كو گرنگیێ ب پاقژیێ و پاراستنا ژینگەهێ بدەن، كو ئەركەكێ ئایینی و نیشتیمانی و مرۆڤایەتیە.
