كۆمبوونەك ل دۆر سەرژێكرنا قوربانان و بەرهنگاربوونا تایا خوینبەربوونێ هاتە كرن

ب سەرپەرشتیا شەمعون شلیمون ئیشۆ، جێگرێ پارێزگارێ دهۆكێ و ب ئامادەبوونا دەڤەردارێن دهۆكێ‌ و سێمێلێ‌ و نوونەرێن ساخلەمیێ و ڤێتێرنەریا دهۆكێ‌ و لایەنێن ئێمناهیێ كۆمبوونەك ل دۆر بەرهنگاربوونا مەترسیا بەلاڤبوونا تایا خوینبەربوونێ و ئامادەكاریێن لایەنێن پەیوەندیدار ل رۆژێن جەژنا قوربانی هاتە ئەنجامدان.
د كۆمبوونێ دا بەحسێ رێكخستنا پروسێسا سەرژێكرنا قوربانان ل رۆژێن جەژنا قوربانیا پیرۆز و رێنمایێن ساخلەمیێ وەكو بەرهنگاربوونا نەخوشیا تایا خوینبەربوونێ ل سنوورێ پارێزگەها دهۆكێ و هەموو ئەگەرێن بەربەلاڤبوونا نەخوشیا ناڤبری و قەدەغەكرنا سەرژێكرنا قوربانان د ناڤ تاخان و بازاڕان و بەر دەرگەهێن مالان و ئینانا گوشتێ بێی باوەرنامە و مورا ساخلەمیێ هاتە كرن.
دیسا كۆمبوونێ‌ دوپاتی ل سەر وێ یەكێ ژی كر، كو پێدڤیە سەرژێكرنا قوربانان ل سەربرخانەیێن فەرمی بیت و تیمێن گەرۆك یێن سازیێن پەیوەندیدار بۆ پاراستنا گیانێ وەلاتیان ب تایبەت قەدەغەكرنا بەرمایكێن قوربانان ل دەوروبەرێن باژێری و تاخان رۆلێ خۆ ب گێڕن و چەند رێكار و رێنمایێن گرێدای بابەتێ كۆمبوونێ دانوستاندن ل سەر هاتە كرن.

کۆمێنتا تە