كۆمبوونەك ل دۆر چارەسەریا ئاریشە و پێدڤیێن چار كەمێن ئاوارەیان هاتە كرن
ب ئامادەبوونا ماجد سەید سالح، جێگرێ پارێزگارێ دهۆكێ و ئەندازیار دیار بەحری، رێڤەبەرێ گشتیێ باژێرڤانیان و خانم رەوشەن ئەترووشی، رێڤەبەرا رێكخراوا VNG یا نێڤدەولەتی و نوونەرێ رێڤەبەریا كۆچ و كۆچبەران دوهی 4/6/2024 روونشتنا ئێكێ یا لیژنا راوێژكاری یا چارەسەریا ئاریشە و پێدڤیێن هەرچار كەمپێن ئاوارەیان، دومیز ئێك و دو و گەویلان و ئاكرێ ل سنوورێ پارێزگەها دهۆكێ هاتە ئەنجامدان و تێدا بەحسێ چاوانیا دانانا پلانەكا گونجای بۆ دابینكرنا پێدڤی و خزمەتگوزاریێن هەرچار كەمپێن ناڤبری هاتە كرن.
هەر د كۆمبوونێ دا دانوستاندن ل سەر پلانا ئێكێ یا لیژنێ هاتەكرن، كو پێكهاتیە ژ چاوانیا چارەسەركرنا ئاریشەیێن ئاڤێ و ئاڤا گران و بەرمایكێن هشك د ناڤ هەرچار كەمپان دا، رێكخراوا VNG یا هۆلەندی ل دۆر ڤان ئاریشەیان بەرنامەیێ خوە پێشكێشی لژنێ كر و ژ لایێ خوەڤە جێگرێ پارێزگارێ دهوكێ وەكو سەرۆكێ لیژنێ ب هووری خالێن چارەسەریێ وەرگرتن، پاشی دەستخوشی ل رێكخراوا ناڤبری كر و گوت: «ئەو ئاكنجیێن د ناڤ كەمپان دا ئەم ب خووشك و برایێن خوە دزانین و خەلكێ مەنە، لەورا هەر رێكخراوەكا د هەر بیاڤەكی دا بەرنامێن خزمەتگوزاری هەبن، ب تایبەت ژی بۆ كەمپێن ناڤبری، ئەم پشتەڤانین و هیڤیخوازین ئەڤ بەرنامێ هاتیە دانان ب شێوەیەكێ باش بهێتە بجهئینان».
