كۆمبوون و پێكڤەژیانا خێزانێ یا جاران نەمایە
زنار تۆڤی:
شارەزایەكێ جڤاكی و دەروونی بۆ رۆژنامەیا ئەڤرۆ دیار كر كو پەروەردە ژ خێزانێ دەستپێدكەت و پەروەردا سەركەفتی ژ خێزانەكا سەركەفتی سەرهەلددەت، لەوما پاراستنا خێزانێ كارەكێ سەرەكییە، بەلێ نوكە د سەردەمێ تەكنۆلۆجیایێ و ئابۆرێ بلەز و ڤان قەیرانێن د جڤاكی دا خێزان تشتەكێ دیترە.
یوسف ئۆسمان، شارەزایێ جڤاكی و دەروونی، دیار كر كو د خێزانا كوردی یا كەڤندا پەیوەندییەكا بهێز دناڤبەرا زارۆیان و دایك و بابان دا هەبوو، ئەو ئەتەكێت و سەرەدانا خزم و كەسوكاران و دوست و هەڤالان و مێهڤانداری و پێكڤە ژیان و پێكڤە نان خوارن و سوحبەت و دانوستاندن گەلەك هەبوون، بەلێ نوكە ئەو خێزانە نەمایە و گۆت: (پێدڤیێن ژیانێ گەلەكن و زارۆك ل ژورێن خۆ یێن تایبەت دانە و هەر ئێك ژ وان مۆبایلا خۆ یا تایبەت هەیە و ب تۆرێن جڤاكی ڤە د مژوولن و خورانێ ژی ل گەل دایك و بابێن خۆ ناخون، خوارنا دەلیڤەری دخون و چو تشت نینە وان كۆمڤە بكەت، لەوما ئەو كۆمبوون و پێكڤە ژیانا خێزانێ یا جاران د نوكە دا نەمایە).
یوسف دیار كر ژی كو گەلەك جاران ئاریشە دناڤبەرا خێزانێ دا دروست دبن، ژبەركو باب مژوولی پەیداكرنا ژین و ژیارا خێزانێ یە و مژوولی مۆبایلێ و تۆرێن جڤاكییە و دچیتە لدەف هەڤالێن خۆ یێن تایبەت، دایكێ ژی ترۆمبێلا خۆ یا تایبەت هەیە و ب ترۆمبێلا خۆ دچیتە مالا خزم و كەسوكارێن خۆ، دچیتە وەرزشێ و سالۆنێ و بازاری، باب ژی ب هەمان شێوە، هەتا دایك و باب گەلەك كێم د میننە ل گەل ئێكودوو، گەلەك كێم پێكڤە گەشت و سەیرانان دكەن، هەر ئێك ژ وان تایبەتمەندییەكا خۆ یا جڤاكی هەیە و گۆت: (دایك زارۆك ژی ل گەل ناچن و ب ڤی رەنگی دویربوونەك دناڤبەرا ئەندامێن خێزانێ دا پەیدا دبیت، ژ روویێ دەروونیڤە ئەڤە خەلەتییەكا مەزنە بەرامبەر پەروەردەكرنێ، چونكی مە پەروەردەكا ئێكگرتی و سەركەفتی دناڤا خێزانێ دا نینە، هەتا كو مە جڤاكەكێ ساخلەم هەبیت، دڤێت ئەم خێزانەكا مەزن دروست بكەین).
شارەزایێ جڤاكی و دەروونی د بەردەوامیا ئاخفتنێن خۆدا دیار كر كو بەری نوكە دایك و باب و مەت و خال و خالەت پێكڤە د روینشتن و راوێژ ب ئێكۆدو دكر، پێكڤە كۆم دبوون و سەرەدانا ئێكۆدو دكر و دانوستاندن ل گەل ئێكودو دكر و زارۆیێن وان ژی مفا ژ ڤێ چەندێ ددیت و گۆت: (بەلێ نوكە هەر ئێك یێ ب كارێ خۆڤە مژوولە، گەلەك كێم ئیكۆدو دبینن، د نوكە دا ل رۆژێن جەژن و بەهی و شەهیان ئێكۆدو دبینن، ئەڤە وەدكەت جڤاكەكێ پرت و بەلاڤ دروست ببیت، ڤێ وەكرییە كو زارۆك بەرێ خۆ بدەنە كافتیریان و جگارە و نارگیلێ بكێشن ل گەل هندێ ڤێ چەندێ وەكرییە، كو ماددێن بێهۆشكەر زێدە ببن و توندوتیژی بەلاڤ ببیت).
یوسف ئوسمان ئەو چەند ژی دا زانین كو نها جڤاكێ كوردی ژ روویێ دەروونی و قەیرانان دچیتە پال جڤاكەكێ نەخۆش و تووشی قەیرانەكا دەروونی یا مەزن بوویە، ئەڤ قەیرانا دەروونی وەكرییە كو تاكێن جڤاكی ژێك دوور بكەڤن، هەروەسا سۆشیال میدیایێ وەكرییە، كو مە ئاگەه ژ ئێكۆدو نەبیت و هەر ئێك بخۆڤە یێ مژوولە.
