كۆمسيۆن دێ سوبه‌هى بڕيارێ ل سه‌ر داخوازيا سه‌رۆكێ هه‌رێمێ ده‌ت
ئه‌ڤرۆ نيوز:
پشتى سه‌رۆكێ هه‌رێما كوردستانێ ژڤانێ هه‌لبژارتنێن سه‌رۆكاتيا هه‌رێما كوردستانێ راگه‌هاندى، كۆمسيۆنا بلندا سه‌ربه‌خۆيا هه‌لبژارتنان راگه‌هاند كو ئه‌وان دو كێشێن دارايى ل پێش هه‌نه و سوبه ژى جڤاتا كۆمسياران دێ كۆم بيت.
هندرين محه‌مه‌د، سه‌رۆكێ كۆمسيۆنا بلندا سه‌ربه‌خۆيا هه‌لبژارتنان و راپرسيێ ل هه‌رێما كوردستانێ بۆ خه‌ندان گۆت: “مه دو ئاسته‌نگێن بودجێ هه‌نه، بودجه‌يه‌ك هه‌تا نوكه نه‌هاتيه دابينكرن بۆ ڤه‌كرنا ئوفيسان و دامه‌زراندنا كارمه‌ندێن كۆمسيۆنێ، بودجه‌ك ژى بۆ مه‌زاختنێ ل وان هه‌لبژارتنان ئه‌وێن سه‌رۆكێ هه‌رێمێ دياركرين”.
سه‌رۆكێ كۆمسيۆنا بلندا سه‌ربه‌خۆيا هه‌لبژارتنان ئاماژه ب وێ چه‌ندێ ژى كر كو بۆ وێ مه‌ره‌مێ سوبه جڤاتا كۆمسيۆنێ دێ كۆم بيت و بڕيارا خوه د وى وارى دا ده‌ت.
ده‌رباره‌يى كا ئه‌ڤ هه‌لبژارتنه گرێدايى كێ نه ژى، سه‌رۆكێ كۆمسيۆنێ گۆت: “ب گۆره‌يى قانوونا كۆمسيۆنێ، هه‌ر هه‌لبژارتنه‌ك و راپرسيه‌كا ل هه‌رێمێ بهێته ئه‌نجام دان دێ ژ لايێ كۆمسيۆنا راپرستى و هه‌لبژارتنان ل هه‌رێما كوردستانێ بيت”.
سه‌رۆكێ هه‌رێما كوردستانێ ئه‌ڤرۆ د رێيا سه‌رۆكێ ديوانا هه‌رێمێ، فوئاد حسێن، دا راگه‌هاند كو ئه‌وان 2ى ته‌باخا 2015ێ وه‌كو ژڤانێ هه‌لبژارتنان ل هه‌رێما كوردستانێ ديار كريه.
