كۆمكوژیا شكەفتا دەكان هاتە ساخكرن
كیڤی دەكانی، وەلاتیەكێ گوندێ دەكانە یێ سەر ب دەڤەرداریا شێخان ڤە بۆ ئەڤرۆ دیار كر، دوهی 18/8/2025 كۆمكوژی و سۆتنا شكەفتا گوندێ دەكان ب بەرهەڤبوونا هەژمارەكا زۆر یا كەساتیێن حزبی و حكومی و كەسوكارێن قوربانیان، د رێورسمەكی دا هاتە ساخكرن.
ناڤهاتی گۆت: «د رۆژەكا وەكو ئەڤرۆ دا ل سالا 1969ێ زێدەتری 74 كەس كو پێكهاتبوون ژ ژن و زارۆك و كەسانێن ب تەمەن د ناڤ شكەفتێ دا سۆتن و ژناڤبرن، د ناڤ قوربانیان دا ژنێن دو گیان ژی هەبوون».
ناڤبری دیاركر ژی كو ئەڤ هەموو ژن و زارۆكە ژ بەر زۆلم و ستەما رژێما بەعس رەڤی بوون و چووبوونە د ناڤ شكەفتێ دا، رژێما بەعس دووڤ دا چوو و هەتا گەهشتینە شكەفتێ، پاشی ئاگر بەردا شكەفتێ و ب ساخی سۆتن، ب تنێ چەند كەسەكێن كێم مابوون ژ ڤێ روودانێ رزگاربوون.
