كۆمكوژیا ل حه‌سه‌كێ
د ده‌ما كو وه‌لاتیێن حه‌سه‌كێ ب ته‌ڤاهی و وه‌لاتیێ كورد ب تایبه‌تی پێشوازی ل سه‌رسالا كوردان و جه‌ژنا وان یا نه‌ته‌وی نه‌ورۆز دكرن و ئاگرێ نه‌وروزێ ل تاخێن باژێر داد دان كو سمبولا ئازدی و پێكڤه‌ژیانێ یه، هه‌روسا په‌یاما ئاشتیێ پێشكه‌شی گه‌لێن هه‌رێمێ و گه‌لێن جیهانێ دكرن، حه‌زێن ره‌ش و نه ئازادیخواز ئه‌ڤ رۆژ ب خوینا پیرۆز خه‌ملاندن، روێ خوه یێ قرێژ د ڤێ رۆژا پیرۆز دا شانی جیهانێ دان. هه‌ر كه‌سه‌كێ بۆیه‌ران دشۆپینه وێ ناسبكه بێ ئه‌ڤ هێزێن ره‌ش سودێ ژ ره‌وشا كوردی یا نه ل سه‌ر هه‌ڤ دگرن و د ئاڤا شه‌لۆ و گراڤیدا ب سه‌ربه‌ستی نێچیرا خوه دكن. د ئه‌نجاما دو ته‌قینیێن خوه‌كۆژ ئێڤارا جه‌ژنا نه‌ورۆزێ، ل ده‌ما ئاهنگان ژبۆ دادانا ئاگرێ نه‌وروزێ یێ پیرۆز ده، ب ده‌هان قوربانی و بریندار ل باژارێ حه‌سه‌كێ كه‌تن. ژ به‌ری ده‌مه‌كێ دژمنێن دۆزا كورد، دوژمنێن ئازدی و مافپه‌روه‌ریێ پلانێن خوه داتینن و د خوازن تاما ئازادیێ ب مه تالبكن. ئاماژه‌یێ ڤان پلانان ژبۆ هه‌ركه‌سی دیاربوون، ما نڤساندنا “شۆره‌شڤانێن باس ئه‌م هاتن” ل سه‌ر دیوارێن مالان ل قامشلۆ”،“ به‌یانامه‌یا جه‌زیر عه‌ره‌بی سووری یه سه‌رێ ڤێ مه‌هێ” و “توهمه‌تا كو هێزێن كوردی عه‌ره‌بان ژ گوندێن وان كۆچدكن” د ده‌ما كو خورت و كه‌چێن كوردان ئه‌و گوند و ده‌ڤه‌ر ژ چه‌ته‌یێن داعشێ رێزگار دكرن به‌ری مه‌هه‌كێ و “سه‌ردانا چه‌ند كه‌ساتیێن عه‌ره‌ب ژبۆ ئیرانێ پاشی وێ په‌یمانامه‌یێ” هه‌كه ئه‌ڤ نه ئاماژه‌یێن ڤێ كریارێ بن، ئێدی وێ چبن؟. به‌رامبه‌ری ڤان مه‌ترسیان ره‌وشا كوردی چ لێ هات؟ كوردان هێڤیدكرن كو ب نێزیكبوونا جه‌ژنا نه‌وروزێ، ئالیێن سیاسی ژی ل رۆژئاڤا ژ هه‌ڤ نێزیك ببن، لێ چاڤێن وان ل رێ ما و تشته‌كی دلێ وان خوه‌شبكه چێنه‌بوو، ڤاژی وێ هات راگه‌هاندن كو لێڤه‌گه‌را سیاسی ژی هات راوه‌ستاندن پشتی هلبژارتنێن كو ل هه‌رێما جه‌زیرێ گه‌ریابوون، له‌وما كوردان ب خه‌مگینی نه‌ورۆزا خوه گه‌راندن و نه ل ئێك قادێ ل حه‌سه‌كێ ئاگر دادان. لێ وانه‌یه‌كی قه‌له‌ن گران ژبۆ مه هات دیاركرن، ئه‌و ژی ئه‌ڤبوو كو ل هه‌ردو قادێن نه‌ورۆزێ كو ئێكێ ئالیگرێن ئه‌نكسێ ل خوه دگرت و یا دن ژی ئالیگرێن ته‌ڤده‌مێ ل خوه دگرت، لێ په‌یاما دوژمنان گه‌هشت كو ئه‌و دژمناتیا كوردان دكن، نه دژمانتیا هزره‌كا سیاسی یان پارتیه‌كێ ب سه‌رێ خوه. په‌یاما نه‌حه‌زێ ئازادیێ زه‌لاله، ئایا كورد و ب تایبه‌ت هه‌ر دو ئالیێن سیاسیی و پێتر ئالیێ ته‌ڤده‌مێ وێ تێ بگه‌هێ كو ئالیه‌ك ب سه‌رێ خوه نكاره پاراستنا گه‌لێ مه بكه ل رۆژئاڤایێ كوردستانێ؟! هه‌كه خوینا شه‌هیدێن نه‌وروزێ كو د كۆمكۆژیا ل حه‌سه‌كێ قه‌ومین نه به‌سبه، ژبۆ كو ئه‌م هه‌لوێست و كارێن خوه بكن یه‌ك، ئه‌ز ڤێ پرسێ دگهینم به‌ر ده‌ستێن هه‌ر كه‌سێ: ئه‌رێ چه‌ند چه‌مێ خوینێ، چه‌ند گۆرێن شه‌هیدان، چه‌ند سێوی و چه‌ند دایكێن كه‌زه‌ب شه‌وتی ژ مه‌ره دڤێن هه‌تا كو ناسبكن خه‌لاسی ژ مه‌ره نینه هه‌كه ئه‌م وه‌ك مله‌ته‌كی یه‌ك هه‌لوێست و رێككه‌فتن ژبۆ مافێ گه‌لێ خوه پێكبینن؟!
