كۆمپانیێن راپرسیان:ئه‌ردۆغان ڤێجارێ نابیته سه‌رۆك كۆمارێ توركیا
ئه‌ڤرۆ:
كۆمپانیێن راپرسیان دیار دكه‌ن كو ژ به‌ر ره‌وشا خراب یا ئابووریێ ئێدی وه‌لاتی وه‌كو جاران پشته‌ڤانیێ ل ئاكپارتیێ و ئه‌ردۆغانی ناكه‌ن، هه‌كه نها هه‌لبژارتن بهێنه كرن ئه‌ردۆغان نابیته سه‌رۆك كۆمارێ توركیا.
كۆمپانیا راپرسیان یا میترۆپۆل راگه‌هاند كو وان ده‌ست ب راپرسیه‌كێ ل پرانیا باژێرێن توركیا كرینه و د ئه‌نجاما راپرسیێ دا دیار بوویه كو وه‌لاتی پشته‌ڤانیێ ل ئه‌ردۆغانی ناكه‌ن و دبێژن ئه‌ردۆغان ب سیاسه‌تا خوه یا خراب ل سووریێ، لیبیا و ئیراقێ بوویه ئه‌گه‌رێ هندێ كو توركیا تووشی قه‌یرانه‌كا مه‌زن یا ئابووری بوویه ئێدی وه‌لاتی وه‌كو به‌رێ پشته‌ڤانیێ ل ئاكپارتیێ و ئه‌ردۆغانی ناكه‌ن، هه‌كه نها هه‌لبژارتن ل توركیا بهێنه كرن رێژا ده‌نگێن ئاكپارتیێ نابیته ٣٠% و رۆژ ب رۆژێ رێژه‌یا ده‌نگێن ئاكپارتیێ كێم دبیت.
هه‌مان كۆمپانیێ ئه‌و یه‌ك ژی دیار كریه كو ل گۆر راپرسیا وان دیار دبیت هه‌كه نها هه‌لبژارتن بهێنه كرن ٤٩% خه‌لكی ده‌نگێ خوه ناده‌نه ئه‌ردۆغانی و دبێژن ده‌م یێ هاتی كو ئه‌ردۆغان ژ ده‌ستهه‌لاتێ دوور كه‌ڤیت و ل هه‌مبه‌ر دا ٤٦% ژی پشته‌ڤانیێ ل ئه‌ردۆغانی دكه‌ن و دبێژن وی شیایه گه‌له‌ك كارێن باش و مه‌زن بۆ توركیا بكه‌ت.
ل ئالیێ دی كۆمپانیا ئۆپتیمار یا راپرسیان ژی دیار كریه كو پڕانیا پشكداربوویێن راپرسیان دیار دكه‌ن كو نها پرسا سه‌ره‌كی یا توركیا پرسا ئابووری یه، گرانی و بێكاری ل توركیا گه‌هشتیه ئاسته‌ك مه‌ترسیدار و ئێدی وه‌لاتی ژ ره‌وشا نها یا ژیانا خوه رازی نینن، ژ به‌ر هندێ ژی د هه‌لبژارتنێن ڤێجارێ دا خه‌لك پشته‌ڤانیێ ل ئه‌ردۆغانی و ئاكپارتیێ ناكه‌ن و دێ گوهۆرینێن مه‌زن ل توركیا روو ده‌ن.
هه‌مان كۆمپانیێ دیار كریه كو ئێدی سه‌رده‌مێ ئه‌ردۆغانی ل توركیا ب دووماهی هاتیه و راپرسیێن نها ژی نیشا دده‌ن كو ئێدی وه‌لاتی ده‌نگێن خوه ناده‌نه ئه‌ردۆغانی، ب تایبه‌تی ژی كه‌سێن كو ڤێجارێ مافێن وان یێ ده‌نگدانێ هه‌نه دبێژن كو ئه‌ردۆغانی توركیا تووشی قه‌یرانه‌كا مه‌زن یا كری و دڤێت كه‌سه‌ك دی ببیته سه‌رۆك كۆمارێ توركیا.
ل گۆر راپۆرتێن كۆمپانیێن راپرسیان پڕانیا پشكداربوویێن راپرسیێ دیار كرینه كو دڤێت سیسته‌مێ سه‌رۆكاتیێ ل توركیا نه‌مینیت، چونكو سیسته‌مێ سه‌رۆكاتیێ بخوه بوویه ژێده‌رێ گه‌له‌ك ئاریشه‌یان و دڤێت سیسته‌مێ توركیا جاره‌كا دی ببیته په‌رله‌مانی، هه‌روه‌سا خه‌لك ژ ئۆپۆزسیۆنێ ژی رازی نینن و داخواز دكه‌ن كو پارتێن ئۆپۆزسیۆنێ پێكڤه به‌رنامه‌كێ بۆ چاره‌سه‌ركرنا ئاریشێن نها یێن توركیا ب تایبه‌تی ژی پرسێن ئابووری به‌رهه‌ڤ بكه‌ن، چونكی هه‌تا نها ژی ئۆپۆزسیۆنێ نه‌شیایه ببیته جهێ باوه‌ریا وه‌لاتیان و دڤێت پارتێن ئۆپۆزسیۆنێ خوه بۆ گوهۆرینێن مه‌زن ل توركیا به‌رهه‌ڤ بكه‌ن، چونكو سه‌رده‌مێ ده‌ستهه‌لاتا ئه‌ردۆغانی ل توركیا به‌ر ب دووماهیێ ڤه دچیت و دبیت گه‌له‌ك تشت ل توركیا روو بده‌ن.
