كۆمیتەیا ناڤەندی یا پارتی ب سەرۆكاتیا سەرۆك بارزانی كۆمبوو و راگەهاندنەك بەلاڤكر
ب سەرپەرشتیا سەرۆك مەسعود بارزانی و ب بەرهەڤبوونا جێگرێن سەرۆكی و ئەندامێن كۆمیتەیا ناڤەندی و یەدەكان و بەرپرسێن لقان، دوهی 26/5/2024 كۆمیتەیا ناڤەندی یا پارتی دیموكراتی كوردستان كۆمبوونا خوە یا بەرفرەه و د رۆژەكا مێژوویی و پیرۆز دا، كو ب هەلكەفتا 48 سالیا شۆرەشا گولانێ بوو ئەنجام دا و تێدا شەش تەوەر هاتنە بەحسكرن.
كۆمیتەیا ناڤەندی یا پارتی دیموكراتی كوردستان د تەوەرێ ئێكێ دا پەیوەندیێن ل گەل وەلاتێن جیران، بەحسكرن و ئاشكرا كر، پەیوەندیێن مە ل گەل كۆمارا ئیسلامی ئەڤرازی و نشێڤی ب خۆ ڤە دیتینە و دەمەكی ساری و تێكنەگەهشتن ب پەیوەندیان ڤە دیاربوون، زێدەباری وێ یەكێ كو پەیوەندیێن مە پێشینەیەكا دێرین و باش هەبوون، پشتی پەیوەندیكرنێ و بزاڤان بۆ ئاسایكرنا پەیوەندیان ل بەرچاڤ وەرگرتنا بەرژەوەندیێن هەردو ئالیان، رەوتا بزاڤێن ئاسایكرنێ یا باش بوو، هیڤیدارین ب ئاراستەیێ رێزگرتن و لتێكگەهشتنێ پەیوەندیێن مە ڤەگەڕنە ئاستێ ئاسایی، دیسا پەیوەندیێن مە ل گەل توركیا و وەلاتێن دی یێن جیهانی، ب تایبەتی ئەمریكا و ئەورۆپا و وەلاتێن عەرەبی د ئاستەكێ باش دانە، كۆمبوون و سەرەدانا شاندێن وەلاتان و شاندێن مە د ئاستەكێ باش دانە، پێدڤیە ژ پێخەمەت بەرژەوەندیێن هەرێما كوردستانێ گرنگیێ پێ بدەین و لڤینێن دپلۆماسی بهێزتر بكەین، هەروەسا كۆمبوون و بزاڤێن سەرۆكاتیا هەرێمێ و حكومەتا هەرێمێ بلند هەلسەنگاندن ب ئاراستەیێ چارەكرنا كێشەیان و بهێزكرنا پەیوەندیان ل ناڤخۆیا ئیراقێ و وەلاتێن جیران و جیهانی.
كۆمیتەیا ناڤەندی یا پارتی د تەوەرێ دویێ دا پەیوەندیێن هەرێما كوردستانێ ل گەل حكومەتا فیدرالی بەحسكرن و د راگەهاندنا وێ دا هاتیە: دەستوورێ ئیراقێ تاكە رێكا چارەكرنا كێشەیانە و پارتی دخوازیت بۆ چارەكرنا كێشەیان پەنایێ بۆ دەستووری و رێككەفتنان ببەن.
هەروەسا د تەوەرێ سێیێ دا بەحسێ هەلبژارتنێن پەرلەمانێ كوردستانێ هاتە كرن د راگەهاندنا كۆمیتەیا ناڤەندی یا پارتی دا هاتیە: پارتی دوپاتكربوو، كو ل گەل كرنا هەلبژارتنانە، داكو پەنا بۆ چ رێكێن دی نەهێتە برن، لێ پشتی بڕیارێن جودا ل سەر هەژمارەكا بابەتێن سیاسی و ئیداری و بجه نەئینانا دەستووری و بنپێكرنا مافێن پێكهاتەیان، پارتی هەلوەستێ خۆ راگەهاند، پشتی چارەكرنا كێشەیان و رێكار د بەرژەوەندییا خەلكی دابن و هەلبژارتن ژ ئالیێ خەلكی ڤە بهێنە پەسەندكرن، دێ هەلوەستێ خۆ دوبارە راگەهینین.
كۆمیتەیا ناڤەندی یا پارتی د تەوەرێ چارێ دا بەحسێ ناڤخۆیا كوردستانێ كر و خویا كر، ل گۆرەی بڕیارا كۆنگرەیی و رێنمایێن سەرۆك بارزانی، پارتی دەرگەهێ دانوستاندنێ ل هەمبەر هەمی ئالیان ڤەكرییە، ب ئارمانجا وێ یەكێ د بەرژەوەندیا خەلكێ هەرێمێ دابیت.
دیسا د تەوەرێ پێنجێ دا كۆمیتەیا ناڤەندی یا پارتی بەحسێ راگەهاندنێ كر و ئاشكرا كریە كو پێدڤیە راگەهاندن رۆلێ نیشتیمانی بگێڕیت د دروستكرنا ئاراستەیێ هەڤدوقەبوولكرنێ و مرۆڤدۆستیێ و پابەندبوون ب بهایێن پێكڤەژیانێ و نەتەوەیی و ئایینی و سیاسی دا.
كۆمیتەیا ناڤەندی یا پارتی د تەوەرێ شەشێ دا بەحسێ ناڤخۆیا پارتی كر و د كۆمبوونێ دا بڕیار هاتەدان ژ بۆ بجهـئینانا پەیرەوێ ناڤخۆ یێ ل كۆنگرەیێ 14ێ هاتیە پەسەندكرن، كۆنفرانسێن ناڤخۆیی ل سەر ئاستێ هەمی ئۆرگانێن پارتی دێ هێنە كرن.
