كۆمێنته‌كا درێژ
به‌رى هه‌یامه‌كێ من پسیاره‌ك رۆژنامه‌ڤانى ده‌رباره‌ى ره‌وشا رۆژه‌ڤا شنگالێ د رووپه‌لێ فه‌یسبووكێ خوه دا به‌لاڤكر، وه‌ك واقعێ هه‌یى كو به‌رى شنگال بهێت رزگار كرن تیرۆرستێن داعشێ ناڤ ل سه‌ر دانابوو (ولایه سنجار) لێ پشتى هێزێن په‌كه‌كێ د كاره‌ساتا داگیركرنا شنگالێ دا د هه‌وارا خه‌لكێ شنگالێ هاتین، نها وان ژى ل به‌ر نینه ب براینى و ئاشتیانه ژ نیڤه‌كا وێ پتر د ده‌ست دا چۆل بكن و راگه‌هاندنا (كانتۆنه‌كا) دى مینا كانتۆنین رۆژئاڤا د به‌رنامه‌یێ وان دایه. ئه‌ڤ ژى نه ره‌فتاره‌ك غه‌ریبه، ژ به‌ر كو ئارمانجا سه‌ره‌كییا په‌كه‌كێ هه‌ر ژ ده‌ستپێكێ رزگاركرنا كوردستانا مه‌زنه، بێى كو هزرێ د واقعێ سیاسى، جوگرافى، جڤاكى و له‌شكریێ هه‌ر ده‌ڤه‌ره‌كا كوردستانا پارچه‌كرى دا بكه‌ت.
وه‌سا دیاربوو هنده‌ك هه‌ڤالێن دژى (پارتى) یان مه‌یلدارێن برایێن په‌كه‌كێ، پشتى به‌لاڤبوونا وى پۆسته‌ى، ب شێوه‌یه‌ك (ئینفیعالى و ته‌عسبى) ده‌ست ب مزایداتێن خوه یێن سیاسى كرن و به‌رگریه‌كا وه‌سا ژ برایێن په‌كه‌كێ كر یێ نه شاره‌زا دا هزر كه‌ت كو ده‌وله‌تا كوردى ل سه‌ر ده‌ستێ په‌كه‌كێ هاتیه راگه‌هاندن. بۆ زانین هنده‌ك ژ ڤان هه‌ڤالێن پشكدارى پۆسته‌یێ من بووین ئه‌و بوون یێن كو جاره‌كێ ژى بۆ پۆسته‌یه‌كى من (لایكه‌ك) ژى لێنه‌داى، تایبه‌ت ئه‌و پۆسته‌یێن ئه‌ز به‌رده‌وام ل سه‌ر شه‌رمزاركرنا شه‌ڕێ برا كوژیێ دنڤیسم.
ئه‌ڤه ژى وێ ناگه‌هینت كو ئه‌ز به‌رگریێ ل سه‌ر به‌هرا ئالیه‌كێ دى ژ ئالیه‌كێ سیاسى یێ كوردى دكم. نوكه ژى دبێژم: شاشى و خه‌مساریا پارتێن هه‌رێما كوردستانى بوو، تایبه‌ت (پارتى) شنگال هاتیه به‌ردان و ئه‌و كاره‌سات ب سه‌رێ كوردێن ئێزدى هاتى و گوننه‌ها وێ چو جاران ناهێت غه‌فران دن و كاریگه‌ریا وێ ل سه‌ر كوردستانێ چو ژ كاریگه‌ریا ئه‌نفالێن ره‌ش و كیمیابارانكرنێ كێمتر نینه!
بلا ئه‌م ژ خوه بگرین دانپێدانێ بكین، هه‌كه ب خێرا وه‌لاتێن زلهێزنه‌بایه، ب هیڤیا حزبێن كوردى و ناكۆكیێن كوورێن د ناڤبه‌را وان دا بایه، كورد نها ژى نه‌دشیان خوه گونده‌كى كه‌تیه به‌ر هێرشا ره‌شا هه‌مه‌جێن داعشێ ژى رزگاربكه‌ن، لێ ئه‌و حزبه هه‌مى بێى جوداهى، بلا نانه‌كێ بخۆن و ده‌هان ب خێرا وان وه‌لاتان بده‌ن، تایبه‌ت ئه‌مریكا كو به‌رژه‌وه‌ندیێن وان ب هه‌مى ئایدیۆلۆژى و بۆچوننێن خوه‌ڤه ڤێ جارێ ته‌ڤلى هه‌ڤى به‌رژه‌وه‌ندیێن كوردستانێ بوون، هه‌كه نۆكه دا ب راستا درووشمێ داعشێ (دوله الخلافه باقیه و تتمدد) ل سه‌ر ئاخا واقعى هێته پراكتیزه‌كرن.
كه‌واته هه‌كه (كۆبانێ) و گوند و باژێرێن دن یێن رۆژئاڤا ب پشته‌ڤانیا هێزێن زلهێز ب سه‌رۆكاتیا ئه‌مریكا و پێشمه‌رگه‌یێ كوردستانێ بۆ شه‌ڕڤانان كرى رزگارببن، شنگالێ ژى ب هه‌مان سیناریۆ، ب پشته‌ڤانیا گرێلا و شه‌ڕڤانان و وه‌لاتێن هه‌ڤپه‌یمان بۆ پێشمه‌رگه‌ی كرى هاته رزگار كرن، نه‌خوه هه‌كه ب هیڤیا شه‌ڕڤانان، په‌كه‌كێ و پێشمه‌رگه‌ى ڤه‌بایه، گه‌له‌كا ب زه‌حمه‌ت بوو، نه كۆبانێ و نه شنگالێ هاتبانه رزگار كرن.
بلا ئه‌قلانه سه‌ره‌ده‌ریێ دگه‌ل كێشه‌یێ بكه‌ین و به‌س بمینێن ئێخسیرێن سۆزداریێ (عاتیفێ) و ده‌مارگیریا كۆرانه، نوكه دێ بێژین راسته دبت ژ ئالیێ له‌شكریڤه هێزێن په‌كه‌كێ ژ هێزێن پارتێن كوردستانى لێكدایتر و په‌یتتربن و نه‌شێن ب شه‌ڕێ براكوژیێ وان ژ شنگالێ ده‌ربێخن، په‌كه‌كه ژى لژێر درووشمێ ئازادكرنا كوردستانا مه‌زن ب خوه ده‌رناكه‌ڤت، پسیار ئه‌وه: ئه‌رێ جڤاكێ نیڤده‌وله‌تى، تایبه‌ت ئه‌مریكا و تركیا پشتى ب دوماهى هاتنا فلمێ داعشێ، دێ قه‌بوول كن شنگال و ده‌ڤه‌رێن دن ل بن كۆنترۆلا په‌كه‌كێ و هێزێن دن یێن نه‌شه‌رعى بمینن؟!
