كۆنفرانسێ پێنگاڤەك (بەرەڤ باژێڕەكێ كەسك) ل زانكۆیا زاخۆ هاتە ئەنجامدان
زاخۆ، دلۆڤان هالۆ:
ل هۆلا كۆلیژا زانست ل زانكۆیا زاخۆ، ئیدارا سەربخوە یا زاخۆ ب هەڤكاری ل گەل زانكۆیا زاخۆ و كوردستان فاوندەیشن، دوهی 29/7/2025 كۆنفرانسێ پێنگاڤەك بەرەڤ باژێڕەكێ كەسك ل زانكۆیا زاخۆ ئەنجام دا.
گوهدار شێخۆ، سەرپەرشتێ ئیدارەیا سەربخوە یا زاخۆ د گۆتارەكێ دا د كۆنفرانسێ پێنگاڤەك بەرەڤ باژێڕەكێ كەسك دا گۆت: «خوەش بەختانە ل زاخۆ پڕۆژە و پێنگاڤێن هەری باش یێن كەسككرنا باژێڕی و پاقژیێ هاتینە هاڤێتن، ئەڤە ژی بۆ هاریكاریا خەلكێ زاخۆ ڤەدگەڕیت، كو خوە ب دلسۆز و خودان دزانن ل ڤی باژێڕی».
سەرپەرشتێ ئیدارەیا سەربخوە یا زاخۆ گۆتژی: «زاخۆ ئێكەم باژێڕە ل سەر ئاستێ ئیراقێ بۆ پاقژییێ و چاندنا داران، سوپاسیا خەلكێ زاخۆ دكەین، بۆ هاریكاریا وان د پاقژڕاگرتنا باژێڕی و كەسككرنا وی دا».
