كۆپیتكا یاریێن ڤێ حەفتیێ دێربیێ پارێزگەهێ یە
قەیس وەیس:
بڕیارە ئەڤرۆ و سوبەهی دەست ب یاریێن گەڕا هەشتێ یا قۆناغا ئێكێ ژ هەڤڕكیێن خولا پلا نایابا كوردستانێ یا تەپا پێی ب ئەنجامدانا هەشت یارییان بهێنە ئەنجامدان یارییا دهۆك و زاخۆ گرنگترین دیدارا ڤێ حەفتیێ یە.
دیدارا ئاگرین د دیربیێ پارێزگەهێ دا
جەماوەرێ وەرزشی یێ هەردو یانەیێن پارێزگەهێ ب ژڤانن بۆ یارییا سوبەهی دەمژمێر 2:30 پشتی نیڤرۆ بۆ دیدارەكا دی یا ئاگرین دناڤبەرا یانەیا دهۆك و یانەیا زاخۆ ئەوا دێ ل یاریگەها سێیێ یا دهۆكێ هێتە كرن ب تاما دێربیێ پارێزگەهێ و بەهدینان، خودانێن ئەردی ب دو سەركەفتن، سێ وەكهەڤی و دو خوسارەتییا ب كۆمكرنا نەهـ خالان رێزا نەهێ دهێت، د بەرانبەر دا تیما زاخۆ دو سەركەفتن، پێنج وەكهەڤی و چو خوسارەتی نینن ب11 خالان رێزا چارێ دهێت، ل وەرزێ بۆری هەردو یانەیان سەركەفتن ل ئێكودو بەلاڤكربوو، زاخۆ ل یاریگەها خوە سەركەفت بوو، هەروەسان دهۆك ژی ل یاریگەها خوە ب سەركەفت بوو، ئەنجامێ هەردو یارییان ژی ئێك ب چنە بوو.
ژلایێ خوەڤە سوبەهی یانەیا ئاكرێ دێ ل یاریگەها خوە یانەیا هندرین مێڤان كەت، كوڕێن پایتەختێ نەورۆز د دەمێ هەستیار دا نە و ئەو ئەنجامێن ڤێ دووماهیێ جهێ نەرازیبوونا كارگێرییا یانێ بووینە و د ئەگەر دا راهێنەرێ تیمێ یێ سۆری یونس سلێمان دەست ژ كارێ خوە بكێشیت ل جهێ وی كوڕێ باژێرێ ئاكرێ هەژار سابر ل جهێ وی بهێتە دانان پێخەمەت ڤەگەڕاندنا سەركەفتنان و ئێكەم تاقیكرنا وی یا سوبەهی بەرانبەر هندرین بیت، نوكە ئاكرێ ب هەشت خالان ژ دو سەركەفتن، دو وەكهەڤی و سێ خوسارەتییان رێزا 12ێ دهێت، مێڤانا وێ 10خال هەنە رێزا حەفتێ دهێت.
ژ یاریێن دی ئەڤرۆ چارشەمبی، سیرۆانی نوو- شەقلاوە، برایەتی- رانیە، سۆران- ئارارات، هەولێر- شێروانە، یاریێن سوبەهی، پێشمەرگەیا هەولێر- چوارقۆرنە، دەربەندیخان- سەیدسادق.
