كۆڕبەندەكێ ئابووری د ناڤبەرا بازرگانێن كوردستانێ و فرەنسا دا ل پاریسێ دێ هێتە گێڕان
زنار تۆڤێ:
سەرۆكێ دەستەیا وەبەرهێنانێ ل هەرێما كوردستانێ دیار كر، بڕیارە ئەڤرۆ 23/9/2024، ل پاریسا پایتەختێ فرەنسا كۆڕبەندەكێ ئابووریێ هەڤپشك د ناڤبەرا هەرێما كوردستانێ و فرەنسا دا ب پشكداریا هژمارەكا بازرگانێن هەردو وەلاتان بهێتە گێڕان و دبێژیت: مەرەم ژ كۆڕبەندی پێشخستنا بازرگانی و وەبەرهێنانێیە د ناڤبەرا هەرێمێ و فرەنسا دا.
د. محەمەد شوكری، سەرۆكێ دەستەیا وەبەرهێنانێ بۆ رۆژناما ئەڤرۆ گۆت: «شاندەكێ حوكمەتا هەرێما كوردستانێ دێ پشكداریێ د كۆڕبەندی دا كەت، هەروەسا هەرێما كوردستانێ ژ سایا بەرنامێ كابینەیا نەهێ یا حوكمەتا هەرێما كوردستانێ كار دكەت و د دەمێن داهاتی دا دێ كەلوپەلێن هەرێما كوردستانێ ڤرێكەتە دەرڤەیی وەلاتی، هەروەسا د وی كۆڕبەندی دا 30 بازرگان و وەبەرهێنەرێن فرەنسی و 30 بازرگان و وەبەرهێنەرێن هەرێما كوردستانێ ژی دێ تێدا پشكدار بن، هەروەسا بەرهەڤیێن هەرێما كوردستانێ دێ نیشا دەین بۆ هاریكاری و ئاسانكاریێ بۆ وەبەرهێنەرێن فرەنسی، داكو بهێن ل هەرێما كوردستانێ كار بكەن و وەبەرهێنانێ بكەن».
ناڤهاتی گۆتژی: «فرەنسا ل دەمێ بۆری و نوكە ژی ژ لایێ سیاسی و ئابووریڤە هەردەم پشتەڤانی ل هەرێما كوردستانێ كرییە، لەوما مە دڤێت ژ لایێ سیاسی و ئابووری و وەبەرهێنانێڤە مفای ژ پشتەڤانیا وی وەلاتی وەربگرین، ، ب تایبەتی د سێكتەرێن پیشەسازی و چاندنێ و گەشتوگوزاری دا، لەوما مە ڤیایە وان پەیوەندیان پێشبێخین و ب هێز بكەین، ئەڤە كۆڕبەندێ ئێكێ یە د ناڤبەرا فرەنسا و كوردستانێ دا دهێتە گێڕان، هەروەسا میدیایا فرەنسی ژی گرنگیەگا تایبەت ب ڤی بابەتی دایە».
