كۆڤان خورشید: گۆره‌پانا زاخۆ شیانێن مه‌زنتر هه‌نه هه‌كه پشته‌ڤانی هه‌بیت
زاخۆ، عه‌لی حاجی:
د داخویانیه‌كێدا راهێنه‌رێ تیما یاریێن گوره‌پانێ یا یانا زاخۆ بۆ رۆژناما ئه‌ڤرۆ دیاركر كو ب چار یاریزانێن باژێرێ زاخۆ شیان رێزێن پێشیێ ل سه‌ر ئاستێ هه‌ردو قاره‌مانیێن ئیراقێ و كوردستانێ یێن سیانی بۆ یاریێن گۆره‌پانێ، پایسكلان و مه‌له‌ڤانیا ب ده‌ستڤه بینین و هه‌كه پشته‌ڤانی بوو بهێته كرن شیانێن مه‌زنتر هه‌نه بۆ ناسناڤان.
زێده‌تر كۆڤان خورشید گۆت: پشتی لڤێ دووماهیێ وه‌كو نوونه‌را پارێزگه‌ها دهۆكێ تیما مه پشكداری هه‌ردو قاره‌مانیێن ئیراقێ و كوردستانێ یا سیانی بووین ئه‌وا ب پشكداریا ده‌ه یانا ل باژێرێ دوكان یا پارێزگه‌ها سلێمانیێ هاتیه كرن، ده‌رئه‌نجام پشتی هه‌ڤڕكیه‌كا ب هێز دناڤبه‌را یاریزانان دا شیاین د قاره‌مانیا ئیراقێ دا پلا چارێ ب ده‌ستڤه‌بینین و پلا دویێ یا كوردستانێ بهێن، هه‌رچه‌نده ئه‌ڤه نه هیڤیێن مه بوو لێ پشكداریا باشترین یاریزانێن سه‌ر ئاستێ ئیراقێ هه‌ڤڕكی دژوارتر لێكربوو و ژلایه‌كێ دیڤه وه‌كو بچووكترین ژیێ یاریزانا یێن مه بوون چونكو یاریزان گه‌نچ و خوون گه‌رم بوون و سه‌رباری كێم شاره‌زاهیێ لێ ده‌ست ژ هه‌ڤڕكیێ به‌رنه‌دان.
ژلایه‌كێ دیڤه ناڤهاتی ئه‌وچه‌نده ژی دیاركر كو ب پشته‌ڤانیا حه‌كیم پیرۆ به‌رپرسێ پشكا جه‌ماوه‌ری یا لقا هه‌شت یا پارتی دیمۆكراتی كوردستان و دیسان سه‌رۆكێ یانا زاخۆ شیان پشكداریێ بكه‌ت و گه‌شبینن بۆ ب ده‌ستڤه‌ئینانا ئه‌نجامێن مه‌زنتر و دێ به‌رده‌وامبن ل سه‌ر راهێنانێن خوه ب هیڤییا هه‌بوونا پشته‌ڤانیێ ژبۆ بلندكرنا ناڤێ زاخۆ و پێشخستنا وه‌رزشا ده‌ڤه‌رێ.
