كیكبۆكسینگا دهۆك و ئامێدیێ بوونە قارەمانێن پارێزگەهێ
هەردو یانەیێن ئامێدیێ و دهۆكێ ب ناسناڤێ قارەمانییا كیكبۆكسینگا پارێزگەها دهۆكێ هاتنە خەلاتكرن، پشتی شیاین ل رێزێن ئێكێ ل سەر ئاستێ پشكۆژ و تازەپێگەهشتییان بهێن، د هەڤڕكیێن واندا ئەوا ب پشكدارییا پێنچ یانەیێن پارێزگەهێ ل هۆلا گرتییا چالاكیێن وەرزشی و دیدەڤانی ل پەروەردەیا پارێزگەها دهۆكێ هاتیە كرن.
ل سەر ئاستێ پشكۆژان ئەوا بۆ ژیێن حەفت هەتا 11 سالی پشتی هەڤڕكییەكا دژوار دناڤبەرا یاریزانێن یانەیان ل دووماهیێ یانەیا ئامێدیێ ب كۆمكرنا 25 خالان رێزا ئێكێ هاتن دهۆك ب 23 خالان رێزا دویێ و كیكبۆكسینگا زاخۆ ب 18 خالان رێزا سێیێ هات.
ل سەر ئاستێ تازەپێگەهشتییان دناڤبەرا ژیێن 13 هەتا 15 سالی دا و پشتی هەڤڕكییەكا ب هێز یانەیا دهۆك ب كۆمكرنا 27 خالان ناسناڤ دەستڤە ئینا، ئامێدیێ ب 21 خالان رێزا دویێ و پیرس ب 16 خالان رێزا سێیێ هات.
ل دۆر ڤێ قارەماینێ مەحفۆز ئیبراهیم سەرۆكێ ئێكەتیا كیكبۆكسینگا پارێزگەها دهۆكێ بۆ رۆژنامەیا ئەڤرۆ گۆت: ل دووڤ بەرنامەیێ سالانە و نەخشەیێ رێكخستی یێ ئێكەتیا مە و ب هەلكەفتا 16ێ تەباخێ سالرۆژا دامەزراندنا پارتی دیموكراتی كوردستان و ژدایكبوونا سەرۆك مەسعود بارزانی ب هەڤكاری دگەل نوونەراتییا دهۆك یا لژنەیا ئۆلمپی بۆ وەرزێ نوو ئێكەم چالاكی ل سەر ئاستێ ژیێن بچووك بوویە پێخەمەت دانانا نڤشەكێ نوو و زێدەتر پووتە دان ب یاریزانێن بچووك ژبۆ پاشەرۆژا وەرزشا پارێزگەهێ، قارەمانی زێدەتری 60 یاریزانێن ژیێن بچووك ژ پێنچ یانەیان پشكداری كربوو ئەوژی دهۆك، زاخۆ، پیرس، ئامێدیی و شێخان، پێخوەشحالین ب سەركەفتیانە و گەشبینی ئەڤ قارەمانییە دەربازبوو.
هەروەسان ناڤهاتی گۆت: یا گرنگ بوومە و هەمی یانەیان نە دەستڤە ئینانا ناسناڤی بوو بەلكو دانانا نڤشەكێ نوو پێخەمەت پاشەرۆژا گەش یا وەرزشا كیكبۆكسینگێ ل یانەیان و پارێزگەها دهۆكێ ئەوا بۆ ماوەیێ دو رۆژان ل سەر سیستەمێ لایك كۆنتاك هاتیە كرن، سۆپاسییا یانەیێن پشكدار و پشتەڤانییا نوونەراتییا دهۆك و هەڤكارییا رێڤەبەرییا هۆلا چالاكیێن وەرزشی كوب ووینە ئەگەرێن سەركەفتنا چالاكیێ و پشتەڤانیێ بۆ وەرزشێ و گەشبینم دێ بۆ داهاتی باشتر و بهێزتر دیاربیت.
