كیك بۆكسینگا ئامێدیێ پشكا شێری یا میدالییان وەرگرت و دهۆك دەست ڤالا ڤەگەڕیا
بۆ جارا ئێكێ د دیرۆكا خوە دا پێنج یاریزانێن یانەیا ئامێدیێ شیان رێزێن ئێكێ هەتا سێیێ ل سەر ئاستێ قارەمانییا كیك بۆكسینگا ئیراقێ بۆ پێشكەفتیان ب دەستڤە بینن، د هەڤڕكیێن واندا ئەوا ل شەمبییا بۆری ب پشكدارییا 350 یاریزانان ژ 25 یانەیێن كوردستانێ و ئیراقێ ل باژێرێ سلێمانیێ بۆ هەردو سیستەمێن Full contract و low kick هاتیە كرن، ژلایێ خوەڤە یانەیا زاخۆ ب ئێك پشكداری شیا رێزا ئێكێ بهێت و یانەیا دهۆكێ بۆ جارا ئێكێ ددیرۆكا خوە دا پشتی چەندین سالێن كۆنترۆلكرنێ دەست ڤالا ڤەگەڕیان.
ئەو یاریزانێن یانەیا ئامێدیێ رێزێن پێشیێ ب دەستڤە ئیناین بڤی رەنگی، ئەلند عەبدولرەحمان بۆ كێشا 90كگم ل رێزا ئێكێ هات، بەهزاد سالح ئەحمەد بۆ كێشا 71كگم رێزا ئێكێ، بیرۆژ عیسا سەدیق بۆ كێشا 57 كگم رێزا دویێ، هاریكار سالح ئەحمەد بۆ كێشا 60كگم رێزا سێیێ، ئامەد سەكڤان عەبدوللا بۆ كێشا 51كگم رێزا سێیێ هات.
ژلایێ خوەڤە یاریزانێ یانەیا زاخۆ سیداد سەگڤان حەمو بۆ كێشا 54 كگم رێزا ئێكێ ب دەستڤە ئینا، لێ چ یاریزانێن دهۆكێ نەشیا رێزێن پێشیێ ب دەستڤە بینن.
ل دور ئەرگەێن دەست ڤالەتییا یاریزانێن دهۆكێ سالح كەكۆ راهێنەرێ تیمێ بۆ رۆژنامەیا ئەڤرۆ گۆت: سەرباری بەرهەڤیێن مە یێن بەردەوام بۆ قارەمانیێ و پێشبینییا مە كو ئەم ناسناڤی ب دەستڤە نائینن و ئەڤچەندە ژی مە كارگێرییا خوە ئاگەهداركربوو، ئەگەر ژی ڤەدگەڕیت كو بۆ جارا ئێكێ یە یاریزانێن مە پشكداری سیستەمێ لوك كیك بوویە ئەوا جوداهییەكا بەرچاڤ هەبوویە ژ سیستەمێ فۆل كۆنتاك بۆ ئەگەر تێكەلیەك پەیدابیت ل بەر یاریزانێ مە بەرزەبیت، یا دویێ نە پشكدارییا یاریزانێن مە د قارەمانیێن دەرڤە دا كو زێدەتر ئاستێ خوە پێشبێخن، هەروەسان هەبوونا خەلەتیێن كۆژەك یێن چەند دادڤانان بەرانبەر یاریزانێن مە ئەگەرەكێ دی بوو، لێ هەر چەوابیت بۆ سالا بهێت ئانكو چەند مەهەكێن دی قارەمانی بۆ وەرزێ نوو دێ هەبن و یاریزانێن مە دەلیڤەیا هەلبژارتیێ ئیراقێ بەردەستە و ڤەگەڕیانا ناسناڤێن خوە.
ژلایێ خوەڤە مەحفۆز ئیبراهیم ئەندامێ فدراسیۆنا ئیراقێ و سەرۆكێ فدراسیۆنا پارێزگەها دهۆكێ یا ڤێ یاریێ گۆت: پیرۆزباهییا یاریزانێن سەركەفتی یێن ئامێدیێ و زاخۆ دكەین و بەختەكێ باشتر بۆ یاریزانێن دهۆكێ دكەین، جهێ دەستخوەشیێ نە، یارییا كیك بۆكسینگێ جوداهییا خوە یا هەیی ژ یاریێن دی، هەر ژ بەرهەڤیێن باشتر، جەستەی و هێزێ و وەرگرتنا مفایی ژ هەر پشكداریەكێ، ب گشتی هەموو یاریزانێن پارێزگەهێ خودان شیانن، لێ هندەك جاران كاودان د ناڤ هەڤڕكیێ دا وە دكەت یاریزان ل سەر خوە نەبیت و رێزبەندیێ ژ دەست بدەت، یاریزانێن دهۆكێ شیانێن مەزن هەنە و ژ دەستدانا رێزیێن ئێكێ دووماهی نینە بەلكو پێنگاڤە بۆ باشتر و بهێزتر ڤەگەڕێن هێشتا دەلیڤە یا ل بەردەست و قارەمانی بۆ وەرزێ 2025ێ دزوورن و دشێن بهێز ڤەگەڕێن و مە باوەری ب وان هەیە.
