كیك بۆكسینگا دهۆكێ بۆ قاره‌مانا كوردستانێ
ئه‌ڤرۆ،
تیما كیك بۆكسینگا یانا دهۆكێ ناسناڤێ قاره‌مانیا هه‌رێما كوردستانێ ب ده‌ستڤه ئینا پشتی یاریزانێن وێ شیاین كونترۆلێ لسه‌ر رێزێن پێشیێ بكه‌ن ب كۆمكرنا 29 خالان و یانا ئالا ب 13 خالان رێزا دویێ هات، د هه‌ڤڕكیێن واندا ئه‌و ل هه‌ولێرا پایته‌خت ب پشكداریا 86 یاریزانان ژ 18 یانێن كوردستانێ بۆ ئاستێ پێشكه‌فتیان هاتیه كرن.
چار یاریزانێن یانا دهۆكێ رێزا ئێكێ هاتین ئه‌وژی، دلۆڤان جه‌مال كێشا 60كگم، محه‌مه‌د ئه‌حمه‌د كێشا 67كگم، مێڤان عه‌بدولكه‌ریم كێشا 70كگم و هۆگر ئه‌مین كێشا 86كگم، هه‌روه‌سان سێ یاریزانێن دی رێزا دویێ هاتن ئه‌وژی، ئه‌نه‌س عه‌بدولره‌حمان كێشا 57كگم، زانا سالح كێشا 63كگم و مسته‌فا فه‌رسه‌ت بۆ كێشا +91 كگم.
د داخویانیه‌كێدا مه‌حفوز ئیبراهیم سه‌رپه‌رشتێ تیما دهۆكێ و سه‌رۆكێ ئێكه‌تیا پارێزگه‌هێ یا یاریا كیك بۆكسینگێ بۆ رۆژناما ئه‌ڤرۆ گوت: یانا دهۆك وه‌كو نوونه‌را ئێكانه یا پارێزگه‌هێ پشكداری قاره‌مانیا هه‌رێما كوردستانێ یا ناسناڤی كر ئه‌وا ژ سه‌رجه‌مێ 12 كێشا بتنێ هه‌شت كێشا پشكداربووین و شیان كۆنترۆلێ لسه‌ر رێزێن ئێكێ و دویێ بكه‌ن و ب ناسناڤێ كوردستانێ بهێنه خه‌لاتكرن، یا گرنگ هه‌موو یاریزانێن مه یێن رێزا ئێكێ و دویێ دێ ب ناڤ و ئالایێ كوردستانێ پشكداری هه‌ر قاره‌مانیه‌كا ڤه‌كری یا نێڤده‌وله‌تی دابن ئه‌ڤه‌ژی ده‌ستكه‌فته‌كێ مه‌زنه بۆ پارێزگه‌هێ و وه‌رزشا دهۆكێ.
ژلایێ خوه‌ڤه سالح كه‌كو راهێنه‌رێ تیما دهۆكێ گوت: یاریزانێَن دهۆكێ بهێزترین ئاست د قاره‌مانیێ دا نیشان دا كو بوونه جهێ ده‌ستخووشیێ و شانازیێ، هه‌رچه‌نده یاریزانێن مه لبن گڤاشتن و كارتیكرنێن پشكداریا وان یا بوری د قاره‌مانیا عه‌ره‌بی دا بوون كو هه‌موو هێزا خوه یا چه‌سته‌یی ب كارئینابوون ل ڤێ قاره‌مانیێ دا ئه‌ڤچه‌نده دیاربوو، لێ رژدیا یاریزان وه‌كر كو ناسناڤ بۆ یانا دهۆكێ بیت و پشكداریه‌كا سه‌رفه‌راز و و هه‌ڤڕكیه‌كا بهێز بكه‌ن.
