كیك بۆكسینگا دهۆكێ و ئامێدیێ ب ئەنجامێن باش ژ قارەمانییا ئیراقێ ڤەگەڕیان
قەیس وەیس:
یاریزانێن هەردو یانەیێن دهۆك و ئامێدیێ ئەنجامێن باش و رێزبەندیێن ئێكێ و دویێ دەستخوەڤە ئینان، ژ چارچووڤێ قارەمانیا ئیراقێ یا یاریا كیك بۆكسینگێ بۆ سیستەمێ k1 و فۆل كۆنتاك، د هەڤڕكیێن واندا ئەوا دوهی ل شەقلاوە یا پایتەختێ كوردستانێ هەولێرێ ب دووماهی هاتی ب پشكدارییا 180 یاریزانان ژ 25 یانەیێن ئیراقێ و كوردستانێ بۆ ماوەیێ چار رۆژان پشكداری كر و هەڤڕكی ل سەر 24 میدالیێن زێری دهاتە كرن.
بۆ سیستەمێ فۆل كۆنتاك زانا سالح كەكۆ بۆ كێشا 61 كگم رێزا ئێكێ دەستڤەئینا، مستەفا فەرسەت بۆ +91 رێزا سێیێ هات، ل سەر ئاستێ سیستەمێ k1 عەلی محەمەد عەلی بۆ كێشا 63 كگم، حەسەن مستەفا حەسەن بۆ كێشا +91 و بەهزاد سالح ژ یانەیا ئەمێدیێ بۆ كێشا 71 كگم كەی وان رێزێن دویێ ب دەستڤە ئینان پشتی د یاریێن خوە یێن دووماهیێ دا خوسارەت بوون.
سالح كەكۆ راهێنەرێ تیما یانەیا دهۆك بۆ رۆژنامەیا ئەڤرۆ گۆت: ئێك ژ نەخۆشترین قارەمانیێن ل سەر ئاستێ ئیراقێ هاتیە كرن، ژبەر هەبوونا كۆمەكا ئاریشەیان د ناڤ هۆلێ دا، جهـ نە یێ گۆنجایی بوو، نەبوونا سیستەمێ ساركرنێ كو كارتیكرنەكا مەزن ل سەر ئاستێ یاریزانێن مە كر بەرۆڤاژی بۆ یێن باشۆرێ ئیراقێ چو كارتیكرن دیار نەبوو، دیسان شێوازێ ئاڤاهیێ هۆلێ زێدەتر هۆل گەرم دكر ژبەركو بانێ وێ ب شێوەیێ ئاسنێ هاتبوو چێكرن، لێ مە گڤاشتن ل سەر یاریزانێن خوە كرن و ئەوان ژی ب زاخەكا بلند هەڤڕكی بۆ رێزێن پێشیێ.
