كییە دووڤچوونا كارێن ئەكادیمیێن فوتبۆلێ بكەت؟
ئیحسان حەسەن
یێن كو دۆڤچوونا كار و بەرنامەیێ هندەك ژ ئەكادیمیێن فوتبۆلێ ل پارێزگەهێ و هەرێما كوردستانێ دكەت، دێ بینیت كو زۆربەی یاریزانێن پشكدار نەشیاینە وەكو پێدڤی كارزانیێن یاریێ بشێوەیەكێ زانستی ژدەستەكێن خوە یێن راهێنانێ وەربگرن، ئانكو ئەم وێ گهورینا بەرچاڤ د ئاستێ واندا نابینین، بێ نەڤیت ڤێ چەندێ ژی ئەگەرێن خوە هەنە، چونكو د بوارێ وەرزشێ دا پێشكەڤتنا راهێنانێ ئارمانجا هەرا سەرەكی یا كو هەموو وەلاتێن جیهانێ لسەر دچن ژبۆ گەهاندنا وەرزشڤانان بۆ بلندترین ئاست، ژبەر هندێ هەر كارەكێ پلانێن وێ لسەر بنیاتەكێ زانستی یێن دروست بیت، دێ بیتە هۆكارەكێ سەرەكی بۆ گەهاندنا یاریزانان بۆ ئارمانجێن وان یێن راستەقینە، ژبەر كو ئەگەر پلان بۆ رێكخستنا شیانێن یاریزانی یێن جەستەیی و تەكنیكی و هزری ودەرونی و هەتا یێن رەوشتی ل چارچووڤەیەكێ دروست دابن، دێ شێن گەهنە ئاستێن باش، ب تایبەت ئەگەر ئەم بزانین كو سال بۆ سالێ ئەم یێ دبینین كو رێژەیا ئەكادیمییان بەرفرهتر لێ دهێن، ژبلی هندێ هاندانا خێزانێن ڤان زارۆكێن ژ نوو پێدگەهن رۆژ بۆ رۆژێ پتر لێ دهێن، بەلكو ل پاشەرۆژێ ببنە ناڤێن دیار ل ئەسمانێ ڤێ یاریێ، لێ یا ئەم تێبینی دكەین كو هەتا نها چ لایەن نینن دۆڤچوونا كارێ ڤان ئەكادیمیان بكەن، ژبەر كو ل دونیایێ هەمییێ و چونكو ئەڤ ئەكادیمیە وەكو كارگەهێن چێكرنا یاریزانانە، ژبلی هندێ كو هەلسەنگاندنەكا هوور و بێ لایەن بۆ كارێ وان ل جهێن راهێنانێ و بەرنامەیێ وان و رێژا چێكرن و بلندكرنا ئاست و پشتەڤانیا وان دهێنە كرن، ئەڤ ئەكایمییە دهێنە پۆلینكرن ل سەر سێ تا چار ئاستان، ئاستێ ئێكێ ئەون یێن كو ئەم دبێژینێ بەهرمەندێن ڤێ یاریێ، كو دهێنە جوداكرن و بەرنامەیەكێ تایبەت ب درێژاهییا سالێ بۆ وان دهێتە دانان، هەر ژ بەرنامەیێ فێربوونێ یێ پێشكەڤتی تا دگەهیتە بوارێ چاڤدیرییا وان، بەلكو ل پاشەرۆژێ هژمارەكا وان ببنە ستێر و پیشەكارێن یاریێ، چونكو جێوازی د ناڤبەرا كارێ هەر ئەكادیمییەكێ ل هەر یان و دەزگەهەكی دا هەیە، لێ شێوازێ ژیانێ لدەڤ هەموویان وەكو ئێكە ب تایبەت یێن گرێدای رۆژانێن راهێنانێ و دەم و جهێن وان، لێ ئەوا نها دهێنە دیتن، ئەم نەشیێن ناڤێ ئەكادیمییان ب داینە ل سەر هەموویان، بەلكو ئەم دشێن بێژنێ بنگەهێن راهێنانێ یان خولێن هاڤینێ، ژبەر كو ئەكادیمیێن دروست پێدڤییە تە كادرەكێ زیرەك وشارەزا یێ چێكرنا یاریزانان هەبیت، لایەنەك هەبیت چاڤدیرێا كارێ وان لدووڤ رێنمایان بكەت، چونكو ل دونیایێ هەموویێ ئێكەتیێن یاریان وەرزشێ پێش دئێخن،پێدڤییە ئێكەتییا فوتبۆلا كوردستانێ ب رێیا لژنەكا تایبەت هەلسەنگاندنەكا بەردەوام بۆ بەرنامە وپلانێن وان یێن درێژ خایەن و مەرجێن وان بكەت، نە هەر گروپەك ب كەیفا خوە ئەكادیمیان ڤەكەت، وەكی ئەو دزانیت ب ڕێڤەببەت، یا من دڤێت بێژم دا كو رۆلێ ڤان ئەكادیمیان تنێ بۆ پشكداریێ و بوراندنا دەمەكێ خوش نەبیت، پێدڤییە دووڤچوونەكا جدی بۆ كارێ ڤان ئەكادیمیان هەبیت، ژبەر كو سەركەڤتنا بەرنامە و كارێ وان دێ كەڤیتە د بەرژوەندیا شەنگستەیێ یاریا ژمارە ئێك دا، مفادارێ ئێكێ هەر دێ وەرزشا هەرێما كوردستانێ بیت.
