كی میلیشیایە؟
غیاس خـالد زێباری
میلیشیا ئەو هێزا چەكدارییە ئەوا ژ دەرڤەر دەستهەلاتێ ب فەرمانا كەسەكی یان لایەنەكی كار دكەت و فەرمانان وەردگریت، ئانكۆ بۆ بەرژەوەندیێن وی كەسی یان وی لایەنی فەرمانان بجهـ دئینیت، ئەگەر دژی گەل و وەلاتێن وی بن. هەر وەكی ئەڤرۆ زۆر وەلاتێن دەڤەرێ بۆ پاراستنا بەرژەوەندیێن خوە ل وەلاتێن دیتر هێزێن تایبەت یێن چەكداری پێكئینانە و ئەڤ هێزە بووینە پشتەڤانیەكا سیاسی ژی ژ بووی وان وەلاتان، چ بەرامبەر پشتەڤانیا ماددی بیت یان هزرێن شۆفینی یێن تائیفی، دەستهەلاتا ئیراق ئێكە ژ وان وەلاتێن بوویە ئێخسیرا هێز و فەرمان و رێنماییی یێن وان گرۆپێن چەكداری یێن بەرژەوەندیێن وەلاتەكێ دیتر دپارێزن و بهێزا پتریا پەرلەمانی خوە كریە هێزەكا قانوونی. ئەڤان گرۆپێن چەكداری لەشكرێ پێشمەرگەهێن كوردستانێ ئەوێ نێزیكی سەد سالایە درووشمێ مرۆڤایەتیێ و مرۆڤ پارێزیێ و ئازادی و رزگاریێ هەلگرتی و ب هێزا باوەری بخۆبوونا و ب شیانێن زۆر سنووردار یێن ماددی و لەشكری ب سەر لەشكرێ رژێمێن ئیراقێ سەركەفتی و رەوابوونا خوە ل گەلێ كورد و پاشان كۆمارا كوردستان ل مەهابات وەرگرتی و هەتا كۆ پشتی ئاڤاكرنا ئیراقا نوو بوویە لەشكرەكێ فەرمی و دانپێدانكری ب دەستوور و قانوونێ، ژلایێ وان گرۆپێن چەكدار ب میلیشیا دهاتە نیاسین و چەندین سالا مۆچە و بوودجێ وان هاتە بڕین، لێ ژ بەركۆ پێشمەرگەهێن كوردستانێ رەوایەتی ل مللەتی وەرگرتیە و خوەدی قانوون و دیسپیلین و فەرماندێ گشتی یە ل هەرێما كوردستانێ، بەرامبەر چ هێزا شكەستن نەدیت هەتا كۆ پشتەڤانیا نیڤدەولتی ژی وەرگرتی . ل بەرامبەر ئەو گرۆپێن پێشمەرگەهــ ب میلیشیا ددیت و هەڤبیر و هەڤكارێن خوە ل وەلاتێن دیتر دئینا كوردستانێ بۆ شەرێ پێشمەرگەهی و خوە ب هێزەكا قانوونی و سەردەست ددیت، ژ بەر گڤاشێن نیڤدەولەتی و هژماركرنا وان وەكی گرۆپێن دەرڤەی قانوونی بەرەڤ ژ ناڤچوونێ نە و زۆر نەمایە هەوارا چەك دانانێ بكەن، مینا حەماس و حزبولڵا یا لبنانی و حەشدا شەعبی. بەردەوامیا گڤاشێن ئەمریكا ل سەر ئیرانێ دەرباوەر پشتەڤانیا وان گرۆپان رۆژ بۆ رۆژێ گرانتر دبن و ب دوور نابینم ل داویێ ئیران دەست بەرداری وان ببین و ئەو گرۆپ ئالایێ سپی هەلبگرن و دانپێدانێ ب میلیشیا بوونا خوە بكەن و پێشمەرگەهێن كوردستانێ ژی وەكی هێزەكا قانوونی و دەستووری بەردەوامیێ ب ئەركێن خوە یێن پیرۆز بدەت كو پاراستنا كوردستانێ و ئارامی و سەقامگیریا وێ یە.
