كێزا سنكی مەترسی ل سەر بەرهەمێ گەنمێ جۆتیاران دروستكریە
ئەڤرۆ
ئاكرێ، رەمەزان زەكەریا:
ئەڤ سالە بارانێن باش بارینە و جۆتیار دلخوەشن ب بەرهەمێ خوە یێ چاندنێ و بەژنا گەنمی بلندبوویە، بەلێ كێزا سنكی دەركەفتیە و بوویە مەترسی ل سەر بەرهەمێ جۆتیارێن دەڤەرێ.
فازل مستەفا، رێڤەبەرێ چاندنا ئاكرێ بۆ ئەڤرۆ گۆت: سالانە كێزا سنكی ل سەر گەنمی دەردكەڤیت، هەر سال ب رەنگەكی دهێت، ئەڤ سالە رێژا وێ یا زۆرە، بەلێ هێشتا ل قووناغا دەستپێكێ دایە، ئەگەر ئەڤ گەنمێن سنكی لێداین بهێنە رەشاندن ئەو مەترسیا ل سەر ژناڤچوونا گەنمی نامینیت».
ناڤهاتی ئاشكرا ژی كر، پێدڤیە ئەڤ كێزا سنكی ب زووترین دەم بهێتە رەشاندن، ئەگەر خەرزێ خوە ل سەر گەنمی دانا، ژناڤبرنا وێ دێ ب زەحمەت كەڤیت، نوكە ژی دەلیڤەكا باش هەیە، كو بهێتە رەشاندن، بەلێ باشترین تشت ئەوە، هەموو گەنم پێكڤە بهێنە رەشاندن، ژ بەركو ئەگەر گەنمەك بهێتە رەشاندن و یێ ب رەخڤە نەهێتە رەشاندن دێ كێزا سنكی دوبارە زڤریتەڤە سەر گەنمی و گۆت:» تیمێن مە دووڤچوونا كێزا سنكی دكەن بۆ وێ چەندێ بزانن ل چەند جهان بەلاڤبوویە و ب زووترین دەم برەشینن و ئەو مەترسیا ل سەر گەنمی دروستكری نەمینیت».
