كێلیا شەدایێ
خورشید تەوفیق باكۆزی
شاها كۆپێن بەرز و بلند
كێلیا دێرین..
ل چەرخێ بۆری پۆستالێن بخوین
ل سەر سینگێ تە سەمادكرن..
پێلێن كەربێ رۆژا شێلی دكەند و
كورێن دلێ تەدا
دكرنە ڕەژوی دكرنە كۆمڕ..
دكوراتییا برینێن تەدا
خەونێن فریشتەیێن ساڤا چبلاق دكرن..
ژێر ئاخ دكرن..!
دالژێر سیبەرا زنارا و
لژێر پەرێن شەنگە كەڤۆكان
دگەل چڤیكان..
ل بەر رۆناهیا پەرشەوتیێن پەلاتینكان
دگەل ئەلندێ عشقێ نەكەن..
برینێن تە ب بێهنا بەیبوون و نێرگزان
ب تیڕۆژكێن چاڤێن مامزان سارێژ نەكەن..
ل كێلیا فرعینی و قەسڕكێ
ل شكەفتا سمتی و كۆپێ ڕەنیێ
ل شۆپا مێرخاس و عەگیدان
ل شۆپا خوینا جانگۆرییان
ئاگرێ نەورۆزێ هەلنەكەن..
شاها كۆپێن بەرز و بلند كێلیا دێرین..
سەرهلدانێ و ڤۆلكانا گەل
بازنێن قەیدا تە شكاندن..
جۆتكەزیێن (كوردستان سالح)
شەهیدا ژ ناڤێ خۆ شەهید
ژبۆ بیرهاتن بستۆ گەردەنا تە ڤەكرن
دوێ گەردەنا شەنگ ئالاندن..
ل سەر سینگێ تە ئالا رەنگین
ب رۆنیا چڕا و بخوینا دلا و
ژ رەنگێ بهارێ نەخشاندن..
شكەفتا چارستین
ژڕۆندكێن سۆر و ژ ڕۆندكێن پڕ خوین..
یێ ژبارووتێ و پەلان هاتینە ئافڕاندن
ژسەر سولاڤێن نوو بووین سولاڤ
ژ كەڤر و كاشێن لێ نەداین تاڤ
تیڕۆژكێن ئازادیێ چاندن..
لبەرسهدانا مژكانێن تە
ل سەر بەنداڤا سەرۆكانیێن كاروانیان و
زۆم و وارگەهێن نەمران..
گەش بوون چڕا و خوشبوون گەشت و
گەش بوو ئەڤین..
گەش بوو ئەڤین..
