كێمترین ئاریشەیێن ئاڤێ ل دهۆكـێ هەنە
هەولێر، قائید میرۆ:
رێڤەبەرێ گشتیێ ئاڤێ ل هەرێما كوردستانێ ئاشكرا كر، ژ بەر زۆربوونا هەژمارا وەلاتیان و كێمبوونا كارەبێ ل وەرزێ هاڤینێ ئاریشەیا كێمیا ئاڤێ پەیدا دبیت و دبێژیت: ژ بەر هەبوونا پڕۆژێ ستراتیژیێ ئاڤا دهۆكێ كێمترین ئاریشەیێن ئاڤێ ل باژێڕێ دهۆكێ هەنە.
ئاری ئەحمەد، رێڤەبەرێ گشتیێ ئاڤێ بۆ رۆژناما ئەڤرۆ دیار كر، ئاریشەیا ئاڤێ د وەرزێ هاڤینێ دا ل هەژمارەكا دەڤەران پەیدا دبیت و گۆت: «ئەڤ سالە ژی مینا سالێن بۆری ئاریشەیا كێمئاڤیێ هەیە، بەلێ ل سەنتەرێ باژێڕێ دهۆكێ ئاریشەیا ئاڤێ هاتیە چارەسەركرن و پڕۆژەیەكێ ستراتیژی بۆ دابینكرنا ئاڤا باژێڕێ دهۆكێ هەیە، لەوڕا ژی كێمترین ئاریشەیێن ئاڤێ ل دهۆكێ هەنە، مە هەژمارەكا پڕۆژەیێن ستراتیژی هەنە، ئەگەر ب دووماهی بهێن ئەڤە ئاریشەیێن ئاڤێ ل پتریا دەڤەران دێ چارەسەر بن».
ئاری ئەحمەد گۆتژی: «سەرۆكێ حوكمەتا هەرێما كوردستانێ گوژمەكێ پارەی بۆ رێڤەبەریا گشتیا ئاڤێ مەزاختیە هەتا ئاریشەیا كێمیا ئاڤێ؛ ل جهێن ئاریشەهەی بهێتە چارەسەركرن، پێدڤیە د وەرزێ هاڤینێ دا ژ بەر كێمیا كارەبا نیشتمانی وەلاتی ئابووریێ د ئاڤێ دا بكەن، چونكی چەند كارەبا نیشتیمانی كێم ببیت كاریگەری ل سەر كێمبوونا ئاڤێ ژی هەیە، هەر دەڤەرەك و تاخەكێ تووشی نەبوونا ئاڤێ ببیت، ئەڤە حوكمەت دێ ئاڤێ ل سەر وان بەلاڤ كەت».
