كێ ب ده‌میرتاش ڤه دا؟ّ
به‌لانسه‌كا ئالۆزه هه‌كه ئه‌م دوور ژ دلۆڤانى و عاتیفه و لانگیریا پسمامێ خوه سه‌لاحه‌دین ده‌میرتاش بكه‌ین چونكو كورده، هه‌كه مرۆڤ ب براگماتیك هه‌مى راستیان به‌رچاڤ بكه‌ت، دێ ئه‌نجام مینته ڤه‌كری، توركیا گه‌له‌ك ب سیسته‌مێ دیمۆكراتیه‌كا ره‌هایى دقه‌بیت و ل سه‌ر هاتیه خۆجهكرن، به‌لێ ئه‌ڤه پارتا دادو گه‌شپێدان یا خوه دسه‌پینیت و كریارێن دكتاتۆری ل پێشچاڤێن جڤاكێ نیڤده‌ولى دكه‌ت، ژ بلى گولله‌بارانكرنا ده‌ڤه‌رێن سنۆری یێن هه‌رێما كوردستانا عیراقێ و سه‌رپێچیكرنا داخوازیێن عیراقێ ل هه‌بوونا وێ ل ناڤ ئه‌ردێ عیراقێ و ل ده‌ڤه‌را باشیكێ و به‌هانه‌یێن وێ بۆ پاراستنا سونه و توركمانێن خوه، تێكدانا ئازادیا رۆژنامه‌ڤانى و داخستنا رۆژناما ئۆزگۆر گونده‌م و ب به‌هانا ریكلامكرنا په‌كه‌كێ و چه‌ندین سازیێن مه‌دیایى و گرێدانا وان ب داواخوزێ ئیسلامى فه‌ته‌حولا گوله‌ن ڤه، دبیت ئه‌ڤه هه‌مى ل ره‌خه‌كى و ل ره‌خه‌كێ دیتر پیلانه‌كا مه‌زنتر دهێته كرن ل دژى ئوپۆزسیۆنا توركى دكارم دوورپێچ بكه‌م ب رۆسیا و رژێما سوورى و مالكیێ مه‌ڤه، كابرا یێ بوویه قوربانى ڤێ چارگۆشا گوڕگوڕى و به‌رژه‌وه‌ندخواز، ماده‌م ده‌وله‌تێن فه‌رمینه و دكارن مینا ب زمانێ جادێ دبێژن (كێڤریشكێ ب عه‌ره‌بانێ دگرن)، هه‌مى تشتان دئێخن د قالبه‌كێ فه‌رمى دا و دكه‌نه لاستیكه‌ك چاوا دخوازن ل دووڤ به‌رژه‌وه‌ندیا خوه برێڤه‌دبه‌ن، ده‌مێ مژارا رۆسیا و توركیا ئازریا و فرۆكا رۆسى ئێخستى، دبیت ده‌مه‌كێ نه‌خۆش بیت بۆ توركیا و سه‌رۆكێ پارتا گه‌لان ده‌میرتاش چوویه مۆسكۆ و ل گه‌ل وه‌زیرێ ده‌رڤه یێ توركیا جڤیایى و پشتى هینگى زڤری و ب وێ عاتیفا گه‌رم و گۆر هێرش كریه سه‌ر ده‌سهه‌لاتا توركیا و د كۆنگره‌كێ رۆژنامه‌ڤانى دا ئه‌و به‌رسڤێت فه‌رمى یێن توركیا وه‌كو ب كلینسه‌كێ ده‌ستئاڤێ بهاكری، هینگى توركیا دبن خوه چوو به‌لێ چو كریار نه‌كرن چونكو هینگى رۆسیا ل سه‌ر هێلێ بوو و ئه‌مریكا و هه‌ڤپه‌یمان دهانا كوردان هاتبوون ژ به‌ر هێرشا داعشان بۆ مووسل و رقه، نها هه‌كه ئه‌م ژى ل جهێ وان باینه دبیت مه گۆتبا ئاگر ژ ده‌همه‌نا مه به‌ربوو مه، دوور ژ وى تێگه‌هێ دیمۆكراتیك كو چه‌ندى ره‌خنه و ده‌نگێن بلند هه‌بن واته ئه‌و دیمۆكراسى ل وى وه‌لاتى بهێزتره، ئه‌ز نا خوازم عاتیفه‌یا خه‌لكێ خوه بریندار بكه‌م، به‌لێ ئه‌ڤرۆ جیهان ب كه‌توارانه سه‌رده‌ریێ دكه‌ن، جاره‌كێ من پسیاره‌ك ژنوونه‌رێ عیراقێ ل یۆنامى كر كانێ چو مژارێن ده‌وله‌تبوونا هه‌رێمێ یان كوردان هه‌نه، به‌رسڤا وى ئه‌و بوو كو ئه‌ڤ مژاره ب چو ره‌نگه‌كى نینه، ته‌نها سه‌رده‌رى ل گه‌ل تشتێن فه‌رمى دهێنه كرن، ل وێ رۆژا ده‌میرتاشى كونگره‌یێ رۆژنامه‌ڤانى دانای پشتى زڤری ژ مۆسكۆ، داخۆیانیێن ئاگرین دان، وه‌سا مۆرال بۆ من چێكرن، ناڤه‌شێرم وێنه‌كێ وى من دانا سه‌ر لاپه‌رێ خوه یێ فه‌یسبۆكى، به‌لێ هه‌ر ئێكسه‌ر گه‌له‌ك هه‌ڤالان خوه ل به‌ر سێنگێ من دان و گه‌له‌ك ئه‌ز گونه‌هباركرم، به‌لێ ئه‌ڤرۆ ئه‌وان ب خوه وێنه‌یێن وى داناینه، هه‌ر چه‌نده ئه‌ڤه نه‌ك مه‌ره‌ما مژارا منه، به‌لێ راسته ده‌میرتاش ب هێزترین لایه‌نێ ئوپوزسیۆنێ یه ل توركیا 59 كورسی نه‌كێمن، به‌لێ ره‌نگه حزبا ده‌سهه‌لات یا خوه ل به‌ر سینگێ رۆسیا دهه‌لاڤێت و عیراقێ ژى ب بانه‌ك و دوهه‌وا حسێب نه‌كه‌ت، به‌لكو هه‌رێما كوردستانێ و سه‌رۆك بارزانى ب هێزتر ژ هه‌میان ددانیت، و ئه‌ز دوور نابینم سه‌رۆك بارزانى ده‌سپێشخه‌ریه‌كێ پێشكێشى ئاردۆگان بكه‌ت بۆ چاره‌سه‌ركرنا ئاریشا ده‌سته‌ركریێن هه‌ڤسه‌رۆك ل گه‌ل ده‌میرتاش، توركیا ناخوازیت چو لایه‌نێن ل ناڤا خوه دا بهێلیت ب هێز و مه‌ترسیدار ل سه‌ر به‌رژه‌وه‌ندیا خوه، چاوا عه‌بدولا ئوجه‌لان ب ده‌ست گرت، چاوا گه‌له‌ك جاران نه‌وه‌یا ئه‌مریكا كریه، ئه‌ڤجا گه‌نجه‌كێ وه‌كو ده‌میرتاش هه‌ر ده‌م تبلا وى ل ناڤ چاڤێن ده‌سهه‌لاتێ و دادوگه‌شه‌پێدان، وه‌كو رۆژا كۆبانێ بزاڤ دكرن رێكێ بۆ سووریێ ڤه‌كه‌ن، پێنه‌ڤێت دێ بێهنا خوه فره‌هكه‌ت و كێشه‌كێ ژ بنێ پێ خوه بۆ چێكه‌ت، نه‌خاسمه ئه‌ڤرۆ ئه‌ڤ زلهێزێن مه‌زن ژى ئیناینه هۆلێ، ئێ پا بلا لاڤرۆڤ بهێته سه‌ره‌دانا سه‌لاحه‌دینێ ده‌میرتاش یان د هه‌وارێ بهێت؟! یا باش ئه‌وه جاران ئوپوزسیۆنێن هه‌مى وه‌لاتان دارى ژ نیڤێ بكرن و بۆ خوه هه‌ناسه‌كا بچووك بهێلن، هه‌كه ئه‌م هه‌مى حه‌ز دكه‌ین سه‌لاحه‌دین ده‌میرتاش ببیته سه‌لاحه‌دینێ ئه‌یۆبى یێ ڤى سه‌رده‌مێ مه و ببیته وجه‌ك بۆ كوردان..
