كەزییێن بەرخوەدانێ
هەژار ئاڤدەل
ئەی هیڤیێن رەنگ بەهتی و دل شکەستی
هوین شاهژنێن پر ئەمەكن ژبۆ سۆز و هەستی
تێکچوونا رویێ وە ڤەرەڤینا ئەلندایە
گری ژی کبارا ژ خەورابوونا شاگردایە
ئێدی بئێشانێ دلێن چرمسی نەگرینن
بقێرینا ئاوازێن خوە یێن زەلال نەمرینن
گەهێن کەڕ و لالێن لەشی ژ خەو راکەن
دلێن دامای و بێ هێز گەش و ئاڤاکەن
وەرن ببنه بانگێ بەسکرنا خەیالێن نڤاندی
بایێ هەناسا وە ژ گولێن بهارێ یێ بشافتی
بێهنێن مسك و عەمبەرا لبەر وە د شۆڕن
تان و پنی ژ ئالەك و رویکێن وە د دوورن
نالین و ژان و ئازار ل مەملەکەتا وە هەلاتن
بویکێن بێ سیرۆشك و پەناگەه و خەلاتن
تەختێ ئەنیا وە نەیێ بگرێ و دەرز و نهالە
دەریا ئاڤا سویر لناڤ مژویلانکادا یا زەلالە
نەچن و پشت نەدەن چەرخ و فەلەکا
حەیفا شەرمینێن بڕوومەت وکەزی و پۆر خەلەکا
لجهێ خو بمینن و وان تان و ژانا بنخێڤن
بەسە ئۆمێدا ب کونج و قورنەتا بێخن
مانە چەرخا فنجانی د خیچا مەدا یا راوەستیایی؟
نێ بێئەختوباریا زەمانی ژی دگەل مە یا وەستایی
ئێدی بلا گری ل چاڤێن موریدا مشە نەبیت
ئاها قەولە كۆپیتکا کەیفێ دێ عەرشێ وەبیت
ئەز دزانم داخ بدلی و گریا وە ژ نەچاریە
بەس کێ گۆتیە شلقا بەختێ بهێت بۆ کوردا هەر تاریە ؟
هەدارا لسەر دویرکەفتنا وە هەر یا ب ئازارە
دەمێ بەرزە دبن و دچن وارەکێ ب نیهارە
قولیزێنەکا عەورێن ڕەش دهێن و ڤێك دکەڤن
برویسیێن بێ شەفەق ژی سیتافکێ دەن و درەڤن
زەڤیێن نە کۆلایێن کول و خەما هەر د پەقینە
رۆندکێن سۆر ل چاڤێن هشك و زوها د پێتینە
بلا هەر خەملا گەردەنا وە ب ئاگری دۆرپێچکەن
هۆڤ نەشێن ناخێ کرنۆش بۆ ئاخێ بری هەمبێزکەن
وەرن داکو دەرزێن دلێ شکەستی بگەهینە ئێك
دەروێش و دلسۆتی گەلەك د زۆرن کو بهێنە ژێك
کەفمال و کەوی نە دەرمانێ برینێن کویرە
داڤەرستا دەربازبوونێ ژ داڤ و فێلا نە یا دویرە
قەیدکێن دەستێن وە یێ لسەر زان و پرچیانێ
لنێزیك دێ بنە بانگدێر بر ئاوازێن بەرخوەدانێ
