كەسێن خۆ مەزن دكەن خۆشتڤی نینن
بێوار حەمدی:
خۆ مەزن كرن دیاردەكا تاكە كەسیە و ئەم ڕوژانە ئەڤێ رەفتارێ ل دەڤ هندەك كەسان دبینین، شیرەتكارەكێ دەروونی گۆت: ئەو كەسێ خۆ مەزن دكەت د چاڤێ جڤاكی دا یێ رەت كریە و نە یێ خوشتڤیە و كەس گرنگیێ ژی پێ نادەت.
شیرەتكارێ دەروونی ئەلند محەمەد، د دیدارەكێ دا بو روژناما ئەڤرۆ دیار كر كو خۆ مەزن كرن دیاردەكا تاكە كەسیە دناڤ جڤاكان دا و ئەو كەسە ل دووڤ پیڤەرێن كەسوكی خۆ جیاواز و بلندتر دبینیت ژ تاكێن دی یێن جڤاكی و پتریا جاران كاریگەریا نەرێنی هەر بو وی كەسی بخو دزڤریت.
شیرەتكارێ دەروونی گۆتژی: ئەو كەسێن خۆ مەزن دكەن یان ژی تایبەتمەندیێن خۆ مەزنكرنێ لدەڤ هەین، هەكە ئەم بێژینێ تو خۆ مەزن دكەی دێ بێژیت وەنینە و دێ گەلەك بهانا گریت، هەتا هندەك میكانزمێن بەرگریێ بخو دانیت).
ئەلند ئەو چەندە ژی دا زانین، خۆ مەزنكرنێ گرێدانەكا راستەوخو ب دەروونێ تاكی ڤە هەیە و ئەڤ خۆ مەزنكرنە ژ ئەگەرێ ڤالاتیەكێ یە د كەسایەتیا وی كەسی دا، لەوما داكو خۆ ژ كەسێن دی یێن دناڤ بازنا جڤاكی دا جودا بكەت هندەك ڕەفتارێن نامو ئەنجام ددەت و گوت (ژبەرهندێ ئەڤ كەسە دهێتە رەت كرن ژلایێ جڤاكی ڤە و كەسەكێ خوشتڤی نینە و كەس گرنگیێ پێ نادەت، چونكی هەردەم خو ل پێش دبینیت و ئەڤ چەندە كارتێكرنێ ل پەیوەندیێن وان یێن جڤاكی ژی دكەت ئەو بخو ژی بێزار دبن).
د ئاخفتنێن خۆ یێن دووماهیێ دا شیرەتكارێ دەروونی گۆت: (ژبو نەمان یان كێمبونا ڤێ دیاردا نە جوان د جڤاكی دا ئەم پێدڤی ب پەروەردەكا ساخلەمین ژ خێزانێ و دەزگەهێن گرێدای پەروەردەكرنێ، داكو بشێین تاكەكێ وەسا ئاڤا بكەین كو دوور بیت ژ خۆمەزنكرنێ و خۆ دیتنا زێدە).
