كەمان ئێكەم هەڤالا ڕاستگۆیە دگەل من
بێوار حەمدی:
مۆزیكژەن (كەمال كەمان) كو دەرچۆیێ پەیمانگەها هونەرێن جوانە و لێدەرێ ئامیرەیێ (كەمانێ) یە، د دیدارەكێ دا بۆ رۆژنامەیا ئەڤرۆ گۆت: من كەمان هەلبژارت ژبەركو ئێك ژ ئامیرەیێن سەرەكی یە د گرۆپێن مۆزیكێ دا و هەستێن تایبەت د دەتە گوهداری و ژەنینا كەمانێ ئەز كریمە بەرچاڤ.
هەروەسا گۆت: هەتا نوكە من پشكداری د هژمارەكا ئاهەنگ و فەستیڤالان دا، كو هندەك ژوان ل دەرڤەی وەلاتی بووینە و ئەز هەستێن خوە ب كەمانێ دەردبڕم، چنكو ئێكەم هەڤالا ڕاستگۆیە دگەل من، بۆ زانین هەموو دەمان كارێ مۆزیكێ داهاتێ پێدڤی بۆ مۆزیكژەنی پەیدا ناكەت، لێ ئەڤە ژی ل دووف شیانێن مۆزیكژەنی دمینیت، ئانكو چەند پشكداری زێدەتر بن، هەلبەت ل وی دەمی دێ داهات ژی زێدەتر بیت.
