كەمەرا مرۆڤی پەیوەندی ب پەنجەشێرێ ڤە هەیە؟
ڤەکۆلینەکا نوی دیاردکەت کو پیڤەرێ كەمەرا مرۆڤی رەنگە ببیتە ئاماژە و پیڤەرەکێ گرنگ بۆ ئاشكراكرنا ئەگەرێ تووشبوونا ئەوی كەسی ب پەنجەشێرێ، هەتا هەکە ب رێكوپێكی ژی وەرزشێ بكەت.
د وێ ڤەکۆلینێ دا زێدەتر ژ 315 هزار كەسان پشکدار بوون، ڤەکۆلەران ل زانكۆیا ریگنسۆبێرگ ل ئەڵمانیا جوداهی دناڤبەرا ئەوان كەسانكر كو پابەندنبوون ب رێنمایێن رێكخراوا ساخلەمیا جیهانی تایبەت ب قەبارێ كەمەرێ و چالاكیێن لەشی و ئەوێن پابەند نەبوون، د چاڤدێریكرنا وان بۆ دەمێ 11 سالان، 30 كەس ژوان تووشی پەنجەشێرێ بوون.
دەركەفت ئەو ژن و زەلامێن ب دەست زێدەبوونا كێشێ و چەوریێن كەمەرێ دناڵن، مەترسییا زێدەتر یا تووشبوونا وان ب پەنجەشێرێ ب رێژا 11% ل سەرە، ئەوێن پابەندی رێنمایێن وەرزشكرنێ نەبووین ژی ب رێژا 4% ئەگەری تووشبوونیان زێدەترە، هەتا هەکە د زەعیف ژی بن، ئەوێن پابەندی هیچ رێنمایەکێ نەبووین مەترسییا تووشبوونا وان 15% زێدەدکەت.
مەترسیێن زێدەبوونا كەمەرا مرۆڤی ل وی دەمی دەست پێدکەت كو ژ 102 سانتیمەتر بۆ زەلامان و 88 سانتیمەتر بۆ ژنان زێدەتر بیت، رێكخراوا ساخلەمیا جیهانی رێنمایان ددەت حەفتیانە 150 بۆ 300 دەقیقا راهێنانێن مامناوەندی وەرزش بهێتەکرن، یان 75 بۆ 150 دەقیقا راهێنانێن دژوار، یان تێكەلێن هەردو جۆرا، ژوانژی رێڤەچوونا بلەز و پایسكلسواری و غاردان و تەپا پێی.
ئەگەرێ هەبوونن پەیوەندیێ دناڤبەرا كەمەرێ و ئەگەرێ زێدەترێ تووشبوونێ ب پەنجەشێرێ، بۆ كاریگەریێن چەوریێن زێدە بۆ سەر ئاستێ هۆرمۆننێن لەشی ڤەدگەڕیتەڤە، كو دبیتە ئەگەرێ زێدەبوونا ئاستێ هۆرمۆنێن ئەسترۆجین و تیستۆستیرۆن و ئەنسۆلین، ب ڤێ چەندێ هەودان زێدەدبن و ئەگەرێ تووشبوونێ ب پەنجەشێرێ ژی زێدەدبن.
