كەنگی تاوانبار بەری سزایی دهێتە ئازاد كرن؟
پارێزەرەكی دیار كر كو هەكە تاوانباری رەوشتەكێ باش هەبیت دێ هێتە ئازاد كرن لدووڤ هندەك مەرجا و هەكە هاتە ئازاد كرن و دیسا تاوانەكا دی ئەنجامدا دێ هێتە زڤراندن بو زیندانێ، زێدەباری ماوێ وی یێ سزایێ كەڤن دێ ماوێ تاوانا نوی ژی ل سەر هێتە درێژ كرن.
پارێزەر سیامەند یوسف دیار كر، د ماددا (331) ژ یاسایا 23 یا بنەمایێن دادگەه كرنا سزای یا عیراقی دا هاتیە بەردانا ب مەرج سیستەمەكێ یاسایی یە و كەسێ زیندان كری لدووڤ ڤان مەرجان دهێتە ئازاد كرن ، هەكە رەوشتێ وی یێ باش بیت، بو كارگێریا زیندانێ دیار بو كو رەوشتێ ڤی كەسی باشتر یێ لێ هاتی و نازڤریت بو هندێ كو تاوانەكا دی ئەنجام بدەتەڤە، هەروەسا دڤێت ڤی كەسی چارێكەكا سزایێ خو یێ زیندانێ ئەوێ ل سەر هاتیە سەپاندن تەمام كربیت و گۆت: (ڤی دەمی كارگێریا زیندانێ و داواكارێ گشتی ماف یێ هەی داخوازەكێ بدەتە دادگەها كەتنێ و قازی لدووڤ وی تشتێ لبەر دەست هەی هەكە بو دیار بو كو رەوشتێ ڤی كەسی یێ باشە دێ بریارەكێ دەت كو ئەڤ كەسە ژ زیندانێ بدەركەڤیت).
پارێزەری زێدەتر گۆت: (لێ لدووڤ هندەك مەرجان تاوانبار دێ ئازاد بیت ژ وان ژی دڤێت تاوانباری رەوشتەكێ باش هەبیت و مەرجێ دی ژی ئەوە حەتا ئەڤ كەسە دهێتە ئازاد كرن قازی دێ هندەك پێرابونێن مالی ل سەر سەپینیت بو نمونە دێ بێژیتێ دڤێت تو سوزنامەكێ یان كەفالەتەكێ بدەی ب كوژمەكی كو دێ ژلایێ قازی ڤە هێتە دیار كرن و بێژیتێ هەكە هاتو دوبارە تە تاوانەكا دی ئەنجام دا دێ ئەڤی پارەی دەیە دادگەهێ).
سیامەند گۆتژی: (دیسان هندەك مەرج ب سزای ڤە د گرێداینە كو دڤێت سێ چارێك ژ سزایێ خو بوراندبن یان هەكە سێ چارێك ژ سزایێ خو نە بوراندبن و تاوانا وی ژ وان تاوانا نەبیت یێت ماوێ وان درێژ دڤێت هەر ب كێمی شەش هەیڤ ژ سزایێ خو بوراندبن).
پارێزەری دیار كر ژی، هەكە ئەڤ مەرجە هەموو لدەف تاوانباری هەبن دێ ئەو كەسە هێتە ئازاد كرن و هەكە هاتو چ تاوانێن دی ئەنجام نەدان ئەو دێ یێ ئازاد بیت حەتا سزایێ وی ب دووماهی دهێت، لێ هەكە تاوانەكا دی ئەنجام دا دێ هێتە زڤراندن بو زیندانێ و زێدەباری ماوێ وی یێ سزایێ كەڤن دێ ماوێ تاوانا نوی ژی ل سەر هێتە درێژ كرن.
سیامەندی گوتژی: (ئەڤ سیستەمێ دەركەفتنا ب مەرج ژ هندەك تاوانبارا ناگریت هەكە ئێك ژ ڤان تاوانا ئەنجام دابیت وەكی، تاوانەكا گرێدای ئێمناهیا دەولەتێ یان نێربازی، سەختەكاری، دزینا مالێ دەولەتێ دەست درێژی و زنا) .
