كەڤالێن شێوەكارەكا كورد ل بریتانیا هاتنە نیشادان
زنار تۆڤی
شێوەكار (بەفرین رەشید) كو خەلكا پارێزگەها سلێمانیێ یە، ل گەل كۆمەكا شێوەكارێن جیهانی پشكداری د پێشانگەهەكا شێوەكاری یا هەڤپشك دا كر ب ناڤێ (هێلێن هەڤپشك) كو ل باژێرێ لەندەن پایتەختێ وەلاتێ بریتانیا هاتبوو ڤەكرن.
دەربارەی وێ پێشانگەهێ، ناڤهاتیێ بۆ رۆژنامەیا ئەڤرۆ گۆت: پێشانگەها(هێلێن هەڤپشك) وەك پێشانگەهەكا ناڤەندی بۆ نیشادانا كارێن داهێنەرانە یێن قوتابیێن خواندنا بلند هاتبوو رێكخستن، د ڤێ پێشانگەهێ دا هژمارەكا كارێن هونەری و ڤەكۆلینێن داهێنەران هاتنە نیشادان، كو ژلایێ قوتابیان ڤە هاتبوونە چێكرن و دەربڕین ژ گەشەیا هزری و هونەری یا نڤشێ نوو یێ هونەرمەندان دكەن، ئەز وەك هونەرمەندەكا كورد د ڤێ پێشانگەهێ دا ب هژمارەكا كەڤالان پشكدار ببووم و ئەڤ پێشانگەهە دەلیڤێ پەیدا دكەت بۆ ناساندنا شیان و داهێنانێن قوتابیان، هەروەسا پەیوەندییەكا پتر د ناڤبەرا قوتابی و مامۆستا و جڤاكی و هونەری دا دروست دكەت، كارێن هاتینە نیشادان شێواز و هزرێن جودا بخۆڤە دگرن.
