كەڤال
رەمەزان زەكەریا
پشتی تو چووی ئەڤرۆ هند غەریب مایمە د كۆلانێن باژێری دا، هەموو دخوازن دوعا بۆ بكەم، ڕۆژا چوویی دایكەكێ گۆت: «دوعا بۆ كوڕێ من بكە، یێ چوویە لەشكەریێ». و باپیرەكێ گۆت: «دوعا بۆ هاتنا بارانێ بكە». من نەزانی مەبەستا وان هەمووان چیە، داخوازا دوعا ژمن دكەن، هەتا ڕۆژەكێ پشتی باران باری من های ژ وی باپیری بوو ل سەر رێكا مزگەفتێ دگۆتە نڤێژكەران: «ئەو مرۆڤێ هەنێ ئەوێ لەبەر دیوارێ مزگەفتێ راوەستای یێ دروست نینە، بەلێ یێ دل سافیە هەر دوعا یەكا بكەت قەبیل دبیت». وی دەمی من زانی بەرزەبوونا تە ئەز یێ ژ مرۆڤان دووركریم و هێلایمە دگەل بیرهاتن و هزرێن تە، من هەموو مرۆڤ ب رەنگێ تەدیتن؛ ژبەر هندی ڕۆژانە بەراهیكا خودانێ فرنێ و پۆلیسێن ترافیكێ و ژینگەهپارێزێن باژێری ئەز ل سەر جادەیێ بووم و شەڤانە ژی هەتا باژێر بێدەنگ مابا لەسەر جادەیێ بووم، پاشی دزڤریمەڤ مال بۆ دیتنا تە.
ل ناڤ چار دیوارێن مالدا چو جاران من هزر نەكریە تو یا چووی، هەرشەڤ ژگازیا دەنگێ تە هشیاردبووم، دەما چاڤێن خوە ڤەدكرن بتنێ كەڤالێ تەیێ بێ رح د ژۆرا خوە ڤە ددیت و ژبلی بێ دەنگیا تە ئەز ب تنێ دمینم، تو ژی وەك فریشتەیان دهێی و تەنابینم، من هەر حەز ژ خوە دكر دەما های ژ دەنگێ تە دبوو، وێنەیێ تە یێ ئاشۆپی هەر گاڤ ددیت و هیڤیێن هەبوونێ بۆ من دروست دبوون، بەلێ جارا من كەڤالێ تە ب دەستێن خوە یێن زڤر لێڤا بلۆزێ خۆ یێ دڕیایی پاقژ دكر و ئەو هەست بۆ من دروست دبوو، ئەگەر چاڤێ من ل كەڤالێ تە نەبیت تو ژمن عاجز ببی و دەمێ زڤرینا خوە درەنگ بێخی یان ژی دەمێ دهێی ژبەر ڕۆندكێن من كەڤالێ تە شل ببیت لەورا هەر جار ل دووری كەڤالێ تە دگریم .
هەموو خەلكێ باژێری ئەز ددیتم و ب مرۆڤەكێ وەفا دار ناڤدار كربووم، جارا دگۆت: «ئەڤە مرۆڤەكێ راستە». جارا دگۆت: «رەوشا گەڕەك و باژێرێ مەیە». بەلێ د راستیدا ئەز مرۆڤەكێ بێ رێك و مال بووم، خێرخوازەكێ ب رەخ مزگەفتەكێ ڤە جهەكێ ڤالا بۆ من دروستكربوو، رەخەكێ من بن نهانی بوو رەخەك لەبەر بارانێ، بەلێ كەڤالێ تە ل سەر دیوانا من بوو هەتا دبوو سپێدە، من دگەل دئاخفت و ئاڤاهیێ ژیانێ دگەل ئاڤا دكر.. جارا دا های ژ دەنگێ بانگێ سپێدێ بم و «الصلاە خیر من النوم «.. مەلای ژی نەدزانی هێشتا ئەزێ هشیارم و ژیانا خۆ دگەل كەڤالێ بەرزە ئاڤا دكەم.
